Bihar

بہار کے بیشتر اضلاع میں درجہ حرارت میں کمی

114views

پٹنہ، 28 اکتوبر :- بہار میں ان دنوں موسم خوشگوار بنا ہوا ہے۔ اس کی وجہ سے لوگوں کو نہ تو زیادہ گرمی کا احساس ہورہا ہے اور نہ ہی زیادہ سردی لگ رہی ہے۔ گزشتہ 24 گھنٹوں میں بھاگلپور کے سبور میں سب سے کم درجہ حرارت 17.0 ڈگری سیلسیس درج کیا گیا۔ آئندہ 30 اکتوبر تک پورے بہار میں زیادہ سے زیادہ درجہ حرارت 30۔28 ڈگری سیلسیس اور کم سے کم درجہ حرارت 20۔16 ڈگری سیلسیس کے درمیان رہنے کا امکان ہے۔ محکمہ کے مطابق 5 سے 6 روز تک موسم لوگوں پر مہربان رہے گا۔ ریاست میں کہیں بھی بارش کا کوئی امکان نہیں ہے لیکن بدلتے موسم کی وجہ سے لوگ بالخصوص بچوں کو نزلہ، کھانسی اور بخار جیسی موسمی بیماریوں کی مسلسل شکایت ہو رہی ہے۔ اس کے ساتھ ساتھ نومبر کے مہینے سے در جہ حرارت میں مزید کمی واقع ہوگی اور سردی میں بھی اضافہ ہوگا۔ اس کا مطلب یہ ہے کہ بہار میں چھٹھ پوجا سے سخت سردی پڑنے کا امکان ہے۔ محکمہ موسمیات کے مطابق رات اور دن کے درجہ حرارت میں کافی فرق ہے۔ گزشتہ 24 گھنٹوں کے دوران بیشتر اضلاع میں درجہ حرارت میں کمی درج کی گئی۔ موسمیاتی مرکز کے مطابق ریاست میں مغربی ہوا کا بہائو5.1 کلومیٹر تک جاری ہے جس کی وجہ سے بہار کا موسم عام طور پر خشک رہے گا۔ ہمالیہ کے دامن میں ہلکی سطح کی دھند چھائی رہ سکتی ہے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.