رانچی، 16 جنوری (یو این آئی) ہندوستانی خواتین ہاکی ٹیم نے جھارکھنڈ کے رانچی میں مرنگ گومکے جے پال سنگھ آسٹروٹرف ہاکی اسٹیڈیم میں جاری ایف آئی ایچ ہاکی اولمپک کوالیفائر-2024 کے تیسرے پول-بی میچ میں منگل کو اٹلی کو 5-1 سے شکست دے کر سیمی فائنل میں جگہ بنائی۔
ہندوستان کے لیے آج ادیتا نے پہلے اور 55ویں منٹ میں پنالٹی کارنر پر گول کیا، دیپیکا نے 41ویں منٹ میں پنالٹی اسٹروک، سلیمہ ٹیٹے نے 45ویں منٹ میں اور نونیت کور نے 53ویں منٹ میں فیلڈ گول کیا۔ اٹلی کی جانب سے واحد گول کیملا ماکن نے 60ویں منٹ میں پنالٹی کارنر سے کیا۔
پیرس اولمپکس-2024 کا ٹکٹ حاصل کرنے کے لیے ہندوستان کو اب سیمی فائنل میں پول-اے ٹیبل ٹاپر جرمنی کے چیلنج کا سامنا کرنا پڑے گا۔ ہندوستان اور جرمنی کے درمیان یہ سیمی فائنل میچ 18 جنوری کو ہوگا۔ اس کے ساتھ ہی دوسرے سیمی فائنل میں امریکہ کا مقابلہ جاپان سے ہوگا۔
