Jharkhand

جھارکھنڈ ضمنی انتخاب: جے ایم ایم امیدوار کلپنا سورین نے گانڈے اسمبلی حلقہ سے پرچۂ نامزدگی داخل کیا

213views

منی لانڈرنگ معاملے میں جیل میں بند جھارکھنڈ کے سابق وزیر اعلیٰ ہیمنت سورین کی شریک حیات کلپنا سورین نے آج ریاست کی گانڈے اسمبلی سیٹ سے جھارکھنڈ مکتی مورچہ (جے ایم ایم) کی امیدوار کی شکل میں پرچہ نامزدگی داخل کر دیا۔

قابل ذکر ہے کہ گانڈے اسمبلی سیٹ کے لیے ضمنی انتخاب 20 مئی کو ہوگا، جب ریاست کی سبھی 14 لوک سبھا سیٹوں کے لیے ووٹ ڈالے جائیں گے۔ گریڈیہہ ضلع کی گانڈے اسمبلی سیٹ جے ایم ایم رکن اسمبلی سرفراز احمد کے استعفیٰ کے بعد خالی ہو گئی تھی۔

بہرحال، آج جب کلپنا سورین پرچہ نامزدگی داخل کرنے پہنچیں تو ریاست کے وزیر اعلیٰ چمپئی سورین اور دیور بسنت سورین بھی ان کے ساتھ تھے۔ ہیمنت سورین کے جیل جانے کے بعد سے ہی کلپنا سورین کی سیاست میں سرگرمی کے اندازے لگائے جا رہے تھے۔ ہیمنت سورین کو 31 جنوری کو مبینہ اراضی گھوٹالہ سے جڑے منی لانڈرنگ معاملے میں گرفتار کیا گیا تھا۔ اس سے کچھ وقت پہلے ہی انھوں نے وزیر اعلیٰ عہدہ سے استعفیٰ دیا تھا اور ریاست کے سابق وزیر ٹرانسپورٹ چمپئی سورین کو ان کا جانشیں مقرر کیا گیا تھا۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.