ویلنگٹن، 2 اکتوبر (ہ س)۔ ٹم ساوتھی نے نیوزی لینڈ کے ٹیسٹ کپتان کے عہدے سے استعفیٰ دے دیا ہے، ٹام لاتھم اب کل وقتی کپتان کی ذمہ داریاں سنبھالیں گے۔ نیوزی لینڈ کرکٹ نے بدھ کو مذکورہ بالا اعلان کیا۔یہ اعلان نیوزی لینڈ کی سری لنکا میں ٹیسٹ سیریز 0-2 سے ہارنے کے چند روز بعد کیا گیا ہے۔ کل وقتی کپتان کے طور پر لاتھم کی پہلی اسائنمنٹ ہندوستان کے خلاف آئندہ ٹیسٹ سیریز ہوگی۔نیوزی لینڈ کے تیز گیندباز ساوتھی نے 2008 میں ڈیبیو کرنے کے بعد ٹیم کے لیے 102 ٹیسٹ کھیلے ہیں جس میں انہوں نے 382 وکٹیں حاصل کی ہیں۔ انہوں نے دسمبر 2022 میں کین ولیمسن سے کپتانی کا عہدہ سنبھالا اور 14 ٹیسٹ میچوں میں ٹیم کی قیادت کی، چھ میں فتح، چھ میں شکست اور دو ڈرا رہے۔اپنے عہدے سے دستبردار ہونے کے فیصلے کے بارے میں ساوتھی نے کہا کہ یہ ٹیم کے بہترین مفاد میں لیا گیا ہے۔انہوں نے کہا کہ میرے لیے اتنے خاص فارمیٹ میں بلیک کیپس کی کپتانی کرنا بڑے اعزاز اور فخر کی بات ہے۔ میں نے اپنے پورے کیریئر میں ہمیشہ ٹیم کو اولیت دینے کی کوشش کی ہے اور مجھے یقین ہے کہ یہ فیصلہ ٹیم کے لیے بہت اچھا ہے۔‘‘نیوزی لینڈ جو ورلڈ ٹیسٹ چیمپئن شپ کے پہلے فاتح ہیں، اس وقت ڈبلیو ٹی سی ٹیبل میں چھٹے نمبر پر ہیں۔ وہ ٹیبل ٹاپر بھارت کے خلاف تین ٹیسٹ کھیلیں گے، جس کے میچ بنگلورو (20-16 اکتوبر)، پونے (28-24 اکتوبر) اور ممبئی (5-1 نومبر) میں ہوں گے۔
