نئی دہلی، 2 اکتوبر (ہ س)۔ پاکستانی بلے باز بابر اعظم نے محدود اوورز کی کپتانی سے استعفیٰ دے دیا ہے۔ 29 سالہ بابر کو 2023 ون ڈے ورلڈ کپ میں ٹیم کی مایوس کن کارکردگی کے بعد پاکستان کے وائٹ بال کپتان کے عہدے سے ہٹا دیا گیا تھا۔ حالانکہ صرف تین ماہ کی مدت کے بعد انہیں مارچ 2024 میں اس عہدے پر دوبارہ تعینات کیا گیا تھا۔ بابر کا دوسرا دور بھی خراب رہا۔ پاکستان ٹی 20 ورلڈ کپ کے گروپ مرحلے میں امریکہ سے ہار کر باہر ہو گیا۔ ٹاپ پوزیشن پر رہنے کے بعد روایتی حریف بھارت کے خلاف شکست بھی موضوع بحث رہی۔ ٹیسٹ ٹیم حال ہی میں تاریخ میں پہلی بار بنگلہ دیش سے ہاری ہے۔بابر نے سوشل نیٹ ورک سائٹ ’’ایکس‘‘ پر اپنے فیصلے کا اعلان کیا۔ انہوں نے لکھا، ’’محترم شائقین، میں آج آپ کے ساتھ کچھ خبریں شیئر کر رہا ہوں، گزشتہ ماہ پی سی بی اور ٹیم مینجمنٹ کو دیے گئے اپنے نوٹیفکیشن کے مطابق میں نے پاکستان مینز کرکٹ ٹیم کی کپتانی سے مستعفی ہونے کا فیصلہ کیا ہے۔‘‘بابر نے مزید لکھا، ’’اس ٹیم کی قیادت کرنا اعزاز کی بات ہے، لیکن اب وقت آگیا ہے کہ میں عہدہ چھوڑوں اور اپنی بلے بازی پر توجہ دوں۔ کپتانی ایک مفید تجربہ رہا ہے، لیکن اس نے کام کا بوجھ بھی بڑھا دیا ہے۔ میں اپنی کارکردگی کو ترجیح دینا چاہتا ہوں، میں اپنی بلے بازی سے لطف اندوز ہونا چاہتا ہوں اور اپنے خاندان کے ساتھ اچھا وقت گزارنا چاہتا ہوں، جس سے مجھے خوشی ملتی ہے۔‘‘پاکستان کی فوری وائٹ بال اسائنمنٹس میں اگلے چھ ماہ میں آسٹریلیا، زمبابوے اور جنوبی افریقہ کے دورے شامل ہیں۔ شاہین آفریدی نے بابر کا سابقہ دور ختم ہونے کے بعد ٹی 20 آئی کی کپتانی سنبھالی، لیکن بائیں ہاتھ کے تیز گیند باز کو بھی کپتانی سے ہٹا دیا گیا، جس سے یہ بحث چھڑ گئی کہ پاکستان کا نیا وائٹ بال کپتان کون ہو سکتا ہے۔ پاکستان نے 2023 ورلڈ کپ کے بعد سے کوئی ون ڈے نہیں کھیلا ہے۔
