لوک سبھا انتخابات 2024: بینک اور ڈاک خانے چلائیں گے عوامی بیداری مہم، انتخابی کمیشن کے ساتھ ہوا معاہدہ
انتخابی کمیشن نے آئندہ لوک سبھا انتخاب میں ووٹ فیصد بڑھانے کی اپنی کوششوں کے تحت ووٹرس کے درمیان بیداری پھیلانے کے لیے ایک انتہائی اہم قدم اٹھایا۔ پیر کے روز اس نے بینکوں اور ڈاک خانوں کو اپنے ساتھ جوڑا اور پھر افسران کو اس سے متعلق جانکاری دی۔
قابل ذکر ہے کہ انتخابی کمیشن نے اکثر حق رائے دہی (ووٹنگ) سے متعلق شہری آبادی اور نوجوانوں کے مایوس کن رویہ پر فکر کا اظہار کیا ہے۔ یہ فکر اس بات کو دیکھتے ہوئے ظاہر کی گئی ہے کہ کئی رجسٹرڈ ووٹرس گزشتہ انتخابات میں ووٹ دینے کے لیے پولنگ مراکز پر نہیں پہنچے۔ گزشتہ پارلیمانی انتخابات میں 91 کروڑ ووٹرس میں سے 30 کروڑ سے زائد نے حق رائے دہی کا استعمال نہیں کیا تھا۔
انتخابی کمیشن نے لوک سبھا انتخاب سے قبل ووٹرس تک پہنچنے اور ان کے درمیان بیداری بڑھانے کی کوششوں کو رفتار دینے کے لیے دو اہم اداروں انڈین بینک ایسو سی ایشن (آئی بی اے) اور ڈاک محکمہ (ڈی او پی) کے ساتھ ایک معاہدہ (ایم او یو) پر دستخط کیے۔ کمیشن کا کہنا ہے کہ اس پیش قدمی کا مقصد ملک میں انتخابی بیداری بڑھانے کی اپنی کوششوں کو جاری رکھنا ہے۔ انتخابی کمیشن نے حال میں اسکولوں و کالجوں کے تعلیمی نصاب میں انتخابی خواندگی کو رسمی طور سے شامل کرنے کے لیے وزارت تعلیم کے ساتھ بھی ایک معاہدہ پر دستخط کیا تھا۔
