وزیراعلیٰ کے ہاتھوں ملک کی پہلی ’آدی نواس ‘ ایپ کا افتتاح

کہا:وقت کے ساتھ تبدیلی ضروری، بھاگ دوڑ کی زندگی میں تہذیب و ثقافت کو پیچھے نہیں چھوڑ سکتے

جدید بھارت نیوز سروس
رانچی، 26 مئی: ریاست کے وزیراعلیٰ ہیمنت سورین نے آڈرے ہاؤس میں منعقدہ ایک پروقار تقریب کے دوران قبائلیوں کے لیے اور خود قبائلی برادری کے ذریعے تیار کردہ ملک کی پہلی ‘آدی نواس ‘ ایپ کا باضابطہ افتتاح کیا۔ اس موقع پر اجتماع سے خطاب کرتے ہوئے وزیراعلیٰ نے کہا کہ وقت کے ساتھ خود میں تبدیلی لانا بے حد ضروری ہے، اور ہمیں اپنی سوچ و فکر میں تخلیقی صلاحیتیں پیدا کرنی ہوں گی۔ انہوں نے تشویش کا اظہار کرتے ہوئے کہا کہ آج کی تیز رفتار اور بھاگ دوڑ بھری زندگی میں ہماری قدیم تہذیب، تمدن اور ثقافت کہیں پیچھے نہ چھوٹ جائے، یہ ہمارے سامنے ایک بڑا سوال اور چیلنج ہے۔
وزیراعلیٰ ہیمنت سورین نے کہا کہ ‘آدی نواس ‘ ایپ کے ذریعے سماجی، تعلیمی اور فکری سطح پر آگے بڑھنے کے لیے کام کرنا ایک اہم چیلنج ہوگا۔ انہوں نے واضح کیا کہ یہ ایپ تمام شعبوں کے قبائلیوں کو ڈیجیٹل دنیا سے جوڑنے کی ایک انقلابی اور دور رس کوشش ہے۔ انہوں نے مزید کہا کہ اس ایپ کے نام ہی میں بہت سی گہری باتیں پوشیدہ ہیں۔ وزیراعلیٰ کا کہنا تھا کہ ہمارا قبائلی معاشرہ مختلف ادوار اور چیلنجوں سے گزرتا ہوا آج ڈیجیٹل پلیٹ فارم تک پہنچ چکا ہے۔ آج پوری دنیا موبائل کی شکل میں مٹھی میں آچکی ہے، جس کی وجہ سے اس ٹیکنالوجی کی اہمیت اور افادیت میں بے پناہ اضافہ ہوا ہے۔
اس سے قبل ایپ کے بانی اور کیپٹن نتن کجور نے ایپ کی خصوصیات اور اس کے مقاصد کے بارے میں تفصیل سے روشنی ڈالی۔ پروگرام کا آغاز نتیش کچھپ اور گریما ایکا کی جانب سے ناگپوری زبان کے ‘کورا گیت ‘ کی خوبصورت پیشکش سے ہوا۔ اس پوری تقریب کا انعقاد ایپ کے جھارکھنڈ ہیڈ سجیت ٹوپو کی رہنمائی میں کیا گیا۔ پروگرام کی نظامت سوربھ کلو اور ایپ کے ڈائریکٹر ایرک کیرکٹا نے انجام دی۔ اس موقع پر راجیہ سبھا ایم پی ڈاکٹر مہوا ماجی، کھجری کے ایم ایل اے راجیش کچھپ، انشو لکڑا، ابھیشیک، آئی پی ایس افسر سروجنی لکڑا، ششی پنا اور امیتابھ پنا سمیت کئی دیگر معززین موجود تھے۔