National

لوک سبھا انتخاب: فرخ آباد میں 7 مرتبہ فرضی ووٹنگ کرنے والا نابالغ حراست میں، پولنگ ٹیم کے سبھی ارکان معطل

66views

اتر پردیش کے فرخ آباد پارلیمانی حلقہ میں آنے والے ایٹہ ضلع کےایک پولنگ مرکز پر ایک 17 سالہ نوجوان کو مبینہ طور سے بی جے پی امیدوار کے حق میں سات مرتبہ فرضی ووٹنگ کرنے کے الزام میں حراست میں لیا گیا ہے۔ ساتھ ہی متعلقہ پولنگ مرکز کی پولنگ ٹیم کے سبھی اراکین کو معطل کرنے اور اس پولنگ مرکز پر از سر نو ووٹنگ کی ہدایت دی گئی ہے۔

سماجوادی پارٹی چیف اکھلیش یادو نے اس فرضی ووٹنگ سے متعلق ایک ویڈیو ’ایکس‘ پر شیئر کی ہے اور کانگریس لیڈر راہل گاندھی نے بھی اس سلسلے میں بیان شیئر کرتے ہوئے کہا کہ ’’اپنی شکست سامنے دیکھ کر بی جے پی مینڈیٹ کو جھٹلانے کے لیے سرکاری نظام پر دباؤ بنا کر جمہوریت کو لوٹنا چاہتی ہے۔‘‘

اس فرضی ووٹنگ معاملے میں اتر پردیش کے چیف الیکٹورل افسر نودیپ رنوا نے ایک بیان جاری کر کہا ہے کہ متعلقہ پولنگ ٹیم کے سبھی اراکین کو معطل کرنے اور ڈسپلنری کارروائی شروع کرنے کی ہدایت جاری کی گئی ہے۔ انھوں نے کہا کہ متعلقہ پولنگ مرکز پر از سر نو ووٹنگ کی سفارش الیکشن کمیشن سے کر دی گئی ہے۔ رِنوا کا کہنا ہے کہ اتر پردیش کے بقیہ مراحل میں بھی الیکٹورل افسران کو ووٹرس کی شناخت کے عمل کو سختی سے انجام دینے کی ہدایت جاری کی گئی ہے۔

رِنوا نے فرضی ووٹ ڈالنے والے نوجوان سے متعلق بتایا کہ ملزم کو پولیس نے پکڑ لیا ہے اور اس کے خلاف متعلقہ دفعات میں ایف آئی آر درج کی گئی ہے۔ اس سلسلے میں نوجوان کی ویڈیو سوشل میڈیا پر وائرل ہونے کے بعد پولیس نے اس کے خلاف ایف آئی آر درج کی اور اسے حراست میں لے لیا۔ ایک افسر نے پیر کے روز یہ جانکاری دی۔ ایف آئی آر کے مطابق 13 مئی کو علی گنج (ایٹہ) اسمبلی سیٹ کے تحت تھانہ نیا گاؤں کے گرام کھریا پماران کے بوتھ نمبر 343 پر پردھان انل ٹھاکر کے بیٹے نے تقریباً سات سے آٹھ مرتبہ فرضی ووٹ ڈالے اور اس کی باقاعدہ ویڈیو بنا کر سوشل میڈیا پر خود پوسٹ بھی کیا۔

نیا گاؤں تھانہ کے انچارج رتیش ٹھاکر نے پیر کے روز بتایا کہ نابالغ کی شناخت کرنے کے بعد اسے حراست میں لے کر آگے کی قانونی کارروائی کی جا رہی ہے۔ فرخ آباد پارلیمانی حلقہ میں اس ضلع کی قائم گنج، امرت پور، فرخ آباد اور بھوجپور اسمبلی سیٹیں آتی ہیں۔ ایٹہ ضلع کی علی گنج اسمبلی سیٹ بھی اسی لوک سبھا حلقہ کا حصہ ہے۔

قابل ذکر ہے کہ سماجوادی پارٹی کے چیف اکھلیش یادو نے اتوار کو سوشل میڈیا پلیٹ فارم ’ایکس‘ پر ایک ویڈیو شیئر کرتے ہوئے اپنے پیغام میں کہا تھا کہ ’’اگر الیکشن کمیشن کو لگے کہ یہ غلط ہوا ہے تو وہ کچھ کارروائی ضرور کرے، نہیں تو… بی جے پی کی بوتھ کمیٹی، دراصل لوٹ کمیٹی ہے۔‘‘ اکھلیش کے ذریعہ شیئر کردہ ویڈیو میں ایک نابالغ بی جے پی امیدوار کے حق میں بار بار ووٹ ڈال کر انگلیوں سے اسے بتا رہا ہے۔

کانگریس لیڈر راہل گاندھی نے اکھلیش یادو کے اس پیغام کو اپنے ’ایکس‘ اکاؤنٹ سے شیئر کیا تھا اور لکھا تھا کہ ’’اپنی شکست سامنے دیکھ کر بی جے پی مینڈیٹ کو جھٹلانے کے لیے سرکاری نظام پر دباؤ بنا کر جمہوریت کو لوٹنا چاہتی ہے۔‘‘ انھوں نے مزید کہا کہ ’’کانگریس الیکشن ڈیوٹی کر رہے سبھی افسران سے یہ امید کرتی ہے کہ وہ اقتدار کے دباؤ کے سامنے اپنی آئینی ذمہ داری نہ بھولیں۔‘‘

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.