الیکشن کمیشن کی بڑی وضاحت:ووٹر کارڈ نہیں؟ پھر بھی ووٹ ممکن

کمیشن نے 12 متبادل دستاویزات کی فہرست جاری کی

پولنگ بوتھ کے اندر موبائل فون لے جانے پر مکمل پابندی

جدید بھارت نیوز سروس
کولکاتہ: مغربی بنگال اسمبلی انتخابات 2026 کے دوسرے اور آخری مرحلے سے قبل ووٹروں کے لیے بڑی وضاحت سامنے آئی ہے۔ الیکشن کمیشن آف انڈیا نے واضح کر دیا ہے کہ اگر کسی کے پاس ووٹر آئی ڈی کارڈ موجود نہیں ہے، تب بھی وہ ووٹ ڈال سکتا ہے—بشرطیکہ اس کا نام ووٹر لسٹ میں درج ہو اور وہ مقررہ متبادل دستاویزات میں سے کوئی ایک پیش کرے۔کمیشن کے مطابق، ووٹر کارڈ کے بغیر بھی ووٹنگ ممکن ہے، لیکن اس کے لیے ووٹر کو کمیشن کی جانب سے جاری کردہ ووٹر سلپ کے ساتھ ساتھ شناخت کے لیے 12 مجاز دستاویزات میں سے کسی ایک کو ساتھ رکھنا لازمی ہوگا۔ ان دستاویزات میں آدھار کارڈ، پین کارڈ، پاسپورٹ، ڈرائیونگ لائسنس، بینک یا پوسٹ آفس پاس بک (تصویر کے ساتھ)، پنشن دستاویز، سرکاری ملازمین کا شناختی کارڈ، جاب کارڈ (100 دن کا کام)، ایم پی/ایم ایل اے کا آفیشل آئی ڈی، لیبر منسٹری کا اسمارٹ کارڈ، ہیلتھ یا انشورنس اسکیم کے کارڈ شامل ہیں۔کمیشن نے یہ بھی بتایا کہ اس بار ووٹر سلپس گھر گھر پہنچانے کے لیے خصوصی مہم چلائی گئی ہے، تاکہ کسی بھی اہل ووٹر کو پریشانی نہ ہو۔ ریاست میں 142 اسمبلی نشستوں پر ہونے والی ووٹنگ کے پیش نظر یہ اقدام خاص اہمیت رکھتا ہے۔دوسری جانب، پولنگ بوتھ کے اندر موبائل فون لے جانے پر سخت پابندی عائد کر دی گئی ہے۔ کمیشن نے واضح ہدایات جاری کی ہیں کہ کوئی بھی ووٹر موبائل فون کے ساتھ بوتھ میں داخل نہیں ہو سکے گا۔ اس کے لیے بوتھ کے باہر فون جمع کرانے کا انتظام کیا گیا ہے، جہاں ووٹنگ کے بعد فون واپس لیا جا سکے گا۔انتخابی حکام کا کہنا ہے کہ ان اقدامات کا مقصد نہ صرف ووٹنگ کے عمل کو آسان بنانا ہے بلکہ اس کی شفافیت اور سکیورٹی کو بھی یقینی بنانا ہے۔ ووٹروں سے اپیل کی گئی ہے کہ وہ ہدایات پر عمل کریں اور وقت پر اپنا حق رائے دہی استعمال کریں۔