پولیس انتظامیہ آنجہانی روہت ترکی کے قاتلوں کی شناخت کر انہیں گرفتار کرے:بابولال مرانڈی

ریاستی حکومت لواحقین کو معاوضہ دے

جدید بھارت نیوز سروس
رانچی، 13اکتوبر: بی جے پی کے ریاستی صدر اور سابق وزیر اعلی بابولال مرانڈی نے اتوار کو رانچی کے لال پور تھانے کے تحت لوہراکوچا کالونی میں آنجہانی روہت ترکی کے اہل خانہ سے ان کے گھرپر ملاقات کی اور تعزیت کا اظہار کیا ۔ میڈیا سے بات کرتے ہوئے مرانڈی نے کہا کہ ریاست میں جرائم عروج پر ہیں۔ کسی کو مارنے سے نہیں ڈرتا۔انہوںنے کہا کہ جوان بیٹے کو کھونے کا دکھ وہی لوگ جانتے ہیں جن کے گھر میں ایسا واقعہ پیش آتا ہے۔ انہوں نے کہا کہ واقعہ کے تین دن گزرنے کے بعد بھی پولیس مجرم کی شناخت نہیں کر سکی۔ جبکہ یہ سی سی ٹی وی سے ممکن ہے۔ اس لیے پولیس کو چاہیے کہ وہ فوری طور پر جائے وقوعہ کی سی سی ٹی وی فوٹیج کی چھان بین کرے اور فوری تحقیقات کرکے قاتل کو بے نقاب کرے۔ انہوں نے کہا کہ پولیس قریبی لوگوں سے پوچھ گچھ کرکے مجرم کی شناخت کر سکتی ہے۔ مجرم کو فوری طور پر پکڑنے سے خوف کی فضا بھی پیدا ہوتی ہے اور واقعہ کے اعادہ کو روکا جاتا ہے۔ انہوں نے کہا کہ آج کل راجدھانی رانچی سمیت پوری ریاست میں منشیات کا استعمال بڑھ گیا ہے جس میں بڑی تعداد میں نابالغ بچے بھی اس کا شکار ہو رہے ہیں۔ نوجوان نسل تباہ ہو رہی ہے۔ انہوں نے کہا کہ ایسی صورتحال میں پولیس کو تعلیمی اداروں اور کوچنگ انسٹی ٹیوٹ کے ارد گرد چیکنگ میں اضافہ کرنا چاہیے تو حکومت کو اس کے لیے خصوصی ٹاسک فورس بھی تشکیل دینی چاہیے۔ انہوں نے کہا کہ انتظامیہ قاتل کو فوری گرفتار کرے اور ریاستی حکومت کو بھی لواحقین کی مانگ کے مطابق مناسب معاوضہ دینا چاہیے۔