جھارکھنڈ سنی وقف بورڈ کے نو منتخب چیئرمین سرفراز احمد نے وزیر اعلیٰ سے ملاقات کی

وزیر اعلیٰ نے وقف بورڈ کی ترقی کیلئے ہر ممکن تعاون کا یقین دہانی کرائی

جدید بھارت نیوز سروس
رانچی، 26 ستمبر: جھارکھنڈ سنی وقف بورڈ کے حال ہی میں ختم ہونے والے انتخابات میں، گانڈے کے سابق ایم ایل اے اور موجودہ راجیہ سبھا ایم پی، سرفراز احمد نے بھاری اکثریت سے چیئرمین کا عہدہ حاصل کیا۔ جیت کے بعد ایم پی سرفراز احمد نے جھارکھنڈ کے وزیر اعلیٰ ہیمنت سورین سے ملاقات کی اور ان کا آشیرواد لیا۔ اس موقع پر وزیر اعلیٰ نے رکن اسمبلی سرفراز احمد کو ان کی جیت پر مبارکباد دی اور وقف بورڈ کی ترقی اور بہتری کے لیے ہر ممکن تعاون کا یقین دلایا۔ وزیر اعلیٰ نے کہا کہ وقف املاک کے صحیح استعمال کو یقینی بنایا جائے گا تاکہ اس سے حاصل ہونے والی آمدنی کو غریبوں، یتیموں اور سماج کے کمزور مسلم طبقے کی ترقی پر خرچ کیا جاسکے۔ وزیر اعلیٰ نے یہ بھی اعادہ کیا کہ وہ وقف ایکٹ 24 کی دفعات کی مخالفت کرتے ہیں اور اسے ختم کرنے کے حق میں ہیں۔ وقف بورڈ کی اہمیت پر روشنی ڈالتے ہوئے وزیر اعلیٰ نے کہا کہ اس کے صحیح کام کاج سے ریاست کے اقلیتی طبقہ کی فلاح و بہبود کے لئے مثبت اقدامات کئے جاسکتے ہیں۔ نیز وقف املاک سے حاصل ہونے والی آمدنی کو تعلیم، صحت اور سماجی بہبود کے پروگراموں میں استعمال کیا جائے گا۔ تاکہ معاشرے کا ضرورت مند طبقہ اس کا براہ راست فائدہ حاصل کر سکے۔ ایم پی سرفراز احمد نے وزیر اعلیٰ کی حمایت پر اظہار تشکر کیا اور وقف بورڈ کی جائیدادوں کے تحفظ اور صحیح استعمال کے تئیں اپنے عزم کا اظہار کیا۔ انہوں نے کہا کہ وقف املاک کے صحیح استعمال کو یقینی بناتے ہوئے اقلیتی طبقہ کی ترقی کے لئے کام کیا جائے گا۔