حکومت نے ’ہِٹ اینڈ رَن قانون‘ نافذ نہ کرنے کا کیا اعلان، ڈرائیورس سے ہڑتال واپس لینے کی اپیل

ڈرائیورس کی ہڑتال نے مرکز کی مودی حکومت پر اپنا اثر ڈال دیا ہے اور حکومت نے اعلان کیا ہے کہ فی الحال نیا ’ہِٹ اینڈ رَن قانون‘ نافذ نہیں ہوگا، بلکہ اس سے پہلے موٹر ٹرانسپورٹ کانگریس سے صلاح و مشورہ کیا جائے گا۔ ساتھ ہی حکومت نے ڈرائیورس سے اپیل بھی کی ہے کہ وہ اپنی ہڑتال واپس لے لیں۔ یعنی ڈرائیورس کی ہڑتال ختم ہونے کا راستہ بھی ہموار ہو گیا ہے۔ مرکزی حکومت نے مذکورہ اعلان آل انڈیا موٹر ٹرانسپورٹ کانگریس (اے آئی ایم ٹی سی) کے ساتھ میٹنگ کے بعد کیا۔ حکومت نے واضح لفظوں میں کہا کہ فی الحال یہ قانون نافذ نہیں ہوگا۔

कोई जब ये कहे कि आंदोलन हड़ताल से क्या फ़ायदा होता है, तो उसे याद दिलाना किसान आंदोलन और अब ट्रक ड्राइवरों का आंदोलन। सरकारें आंदोलनों से ही जनवादी फ़ैसले लेने को मजबूर होती हैं। जनता ये करना छोड़ देगी तो पूँजीपति अपने हक़ में सरकारी नीतियाँ बनवाते रहेंगे।#TruckDriversProtest pic.twitter.com/aBsVjEf2Gg

— Dr. Laxman Yadav (@DrLaxman_Yadav) January 2, 2024

وزارت داخلہ نے میٹنگ کے بعد ایک بیان جاری کیا جس میں کہا گیا ہے کہ قانون فی الحال نافذ نہیں ہوا ہے۔ ایسے میں ڈرائیور کی فکر کو لے کر حکومت کھلے دل سے تبادلہ خیال کے لیے تیار ہے۔ داخلہ سکریٹری اجئے بھلا نے کہا کہ ’’مجرمانہ قانون بھارتیہ نیائے سنہیتا (بی این ایس) کی دفعہ 106(2) میں 10 سال کی سزا اور جرمانہ کی سہولت کے بارے میں گاڑی ڈرائیورس کی فکر کا نوٹس لیا گیا ہے۔‘‘ انھوں نے مزید کہا کہ ’’اے آئی ایم ٹی سی کے نمائندوں سے تفصیلی گفتگو ہوئی۔ حکومت بتانا چاہتی ہے کہ یہ التزام ابھی نافذ نہیں ہوا ہے۔ ہم بتانا چاہتے ہیں کہ اس دفعہ کو نافذ کرنے سے پہلے آل انڈیا موٹر ٹرانسپورٹ سے صلاح و مشورہ کیا جائے گا اور اس کے بعد ہی کوئی فیصلہ لیا جائے گا۔ ہم سبھی گاڑی ڈرائیورس سے اپیل کرتے ہیں کہ آپ اپنے کاموں پر لوٹ آئیں۔‘‘

VIDEO | “We have conveyed your (#TruckDrivers) concerns to the government. The law has not been put into force yet and I assure you that we will not let this law come into force. We appeal to you to go back to your vehicles and start driving without any fears,” says Bal Malkit… pic.twitter.com/qi4hSa4jSz

— Press Trust of India (@PTI_News) January 2, 2024

اس درمیان آل انڈیا موٹر ٹرانسپورٹ کانگریس کے صدر امرت لال مدن نے خبر رساں ایجنسی اے این آئی سے بات چیت کرتے ہوئے کہا کہ ’’ڈرائیور بھائیوں آپ ہمارے فوجی ہیں۔ ہم نہیں چاہتے کہ آپ کو کسی طرح کی تکلیف ہو۔ انھوں نے (حکومت نے) کہا کہ جب تک ہماری اگلی میٹنگ نہیں ہوگی، 10 سال کی جیل اور جرمانہ والا قانون فی الحال نافذ نہیں ہوگا۔‘‘ آل انڈیا موٹر ٹرانسپورٹ کانگریس کور کمیٹی کے صدر ملکت سنگھ نے اس تعلق سے کہا کہ ’’ہم نے ٹرک ڈرائیورس کی فکر سے حکومت کو مطلع کرا دیا ہے۔ یہ قانون ابھی نافذ نہیں ہوا ہے اور میں آپ کو یقین دلاتا ہوں کہ ہم اس قانون کو نافذ نہیں ہونے دیں گے۔ ہم آپ سے اپیل کرتے ہیں کہ آپ اپنی گاڑیوں پر واپس جائیں اور بغیر کسی خوف کے گاڑی چلانا شروع کریں۔‘‘