پرواز بھرنے کے کچھ ہی دیر بعد انڈیگو فلائٹ کی پٹنہ میں ایمرجنسی لینڈنگ، 187 مسافر تھے سوار
انڈیگو کے ایک مسافر طیارے میں تکنیکی خامی کا معاملہ سامنے آیا ہے جس کے بعد اس کی ایمرجنسی لینڈنگ کرانی پڑی۔ اچھی بات یہ رہی کہ طیارہ میں سوار سبھی مسافر محفوظ ہیں اور کسی کو نقصان نہیں پہنچا ہے۔ میڈیا رپورٹس کے مطابق بدھ کے روز پٹنہ ایئرپورٹ پر اس وقت افرا تفری مچ گئی جب دہلی کے لیے روانہ ہونے والی انڈیگو فلائٹ میں پرواز کے فوراً بعد ہی تکنیکی خامی کی خبر ملی۔
بتایا جاتا ہے کہ پٹنہ ایئرپورٹ سے دہلی کے لیے 12.58 بجے انڈیگو فلائٹ 2074 نے پرواز بھری تھی۔ پرواز کے کچھ دیر بعد ہی اس میں خرابی کی جانکاری ملی جس کے بارے میں پتہ چلتے ہی طیارہ میں سوار مسافر پریشان ہو گئے۔ پٹنہ ایئرپورٹ کو ایئر ٹریفک کنٹرول سسٹم کے ذریعہ ملی اس اطلاع کے بعد سب کچھ سنبھالنے کے لیے فوری طور پر تیار ہونا پڑا۔ پھر کچھ ہی دیر کے اندر پٹنہ میں ہی اس طیارے کی محفوظ ایمرجنسی لینڈنگ کرائی گئی۔ طیارہ کی لینڈنگ کے بعد مسافروں نے راحت کی سانس لی۔
پٹنہ ایئرپورٹ کے ڈائریکٹر انچل پرکاش نے بتایا کہ دوپہر 12.58 بجے پٹنہ سے دہلی کے لیے روانہ ہونے کے بعد طیارہ میں تکنیکی خامی کا پتہ چلا جس کے بعد پائلٹ نے پٹنہ واپس لوٹنے کی گزارش کی۔ اس کے بعد فوراً طیارہ بہ حفاظت پٹنہ میں اتار لیا گیا۔ تکنیکی خامی کو دور کیا جا رہا ہے اور سبھی مسافر محفوظ ہیں۔
