West Bengal

مہوا موئترا نے ای ڈی کے سمن کو کیا نظر انداز، کرشنا نگر میں چلائیں گی انتخابی مہم

148views

کولکاتا: ترنمول کانگریس (ٹی ایم سی) لیڈر مہوا موئترا نے انفورسمنٹ ڈائریکٹوریٹ (ای ڈی) کے سمن کو نظر انداز کرتے ہوئے کہا کہ وہ آج کرشنا نگر لوک سبھا حلقہ میں انتخابی مہم چلائیں گی۔ انہیں دہلی میں ای ڈی کے دفتر میں پوچھ گچھ کے لیے حاضر ہونے کو کہا گیا تھا۔

ای ڈی نے فارن ایکسچینج مینجمنٹ ایکٹ (فیما) کی خلاف ورزی کے معاملے میں پوچھ گچھ کے لیے موئترا اور دبئی کے تاجر درشن ہیرانندانی کو تازہ سمن جاری کیا تھا۔ ٹی ایم سی کی 49 سالہ لیڈر مہوا موئترا کو مرکزی ایجنسی نے پہلے دو بار پوچھ گچھ کے لیے بلایا تھا لیکن وہ سرکاری کام کا حوالہ دیتے ہوئے حاضر نہیں ہوئیں اور نوٹس کو ملتوی کرنے کا مطالبہ کیا۔

موئترا کو دسمبر میں لوک سبھا سے مبینہ غیر اخلاقی برتاؤ کی وجہ سے برطرف کر دیا گیا تھا۔ ان کی پارٹی نے انہیں دوبارہ آئندہ لوک سبھا انتخابات میں مغربی بنگال کی کرشنا نگر سیٹ سے اپنا امیدوار نامزد کیا ہے۔

مرکزی تفتیشی ایجنسی (سی بی آئی) نے ہفتہ کو ٹی ایم سی لیڈر کے گھر پر مبینہ طور پر پیسے لینے اور سوالات پوچھنے کے سلسلے میں چھاپہ مارا تھا۔ اس سے کچھ دن پہلے لوک پال نے سی بی آئی کو ہدایت دی تھی کہ وہ بی جے پی رکن پارلیمنٹ نشی کانت دوبے کے ذریعہ موئترا پر لگائے گئے الزامات کی تحقیقات کرے۔ موئترا کا کہنا ہے کہ اس نے کچھ غلط نہیں کیا ہے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.