بیروت 27 اکتوبر (ایجنسی) لبنان میں اسرائیلی فوجی کارروائیاں جاری ہیں اور دوسرے مہینے میں داخل ہوگئی ہیں۔ اب اسرائیل نے جنوب میں دیہاتوں پر درجنوں حملے کیے اور حزب اللہ نے راکٹوں کے ذریعے اس کا جواب دیا۔ العربیہ کے نامہ نگار نے ہفتہ کو اطلاع دی ہے کہ اسرائیل نے جنوبی لبنان کے قصبے انصار پر 4 اور المجادل اور بافلیہ قصبوں پر دو حملے کیے ہیں۔ انہوں نے مزید کہا کہ ان حملوں میں شہر کے جنوب میں تفاحتا میں 5 افراد جاں بحق ہوگئے۔ذرائع نے تصدیق کی ہے کہ ایک اسرائیلی طیارے نے سرحدی شہروں پر تھرمل غبارے یا آتش گیر غبارے چھوڑ دئیے۔ دوسری جانب حزب اللہ نے جواب میں شمالی اسرائیل کے کئی علاقوں کی طرف میزائل داغے جن میں سے 30 بالائی الجلیل تک پہنچ گئے۔ العربیہ اور الحدث ذرائع نے تصدیق کی ہے کہ وہاں ہونے والی لڑائیوں میں 3 اسرائیلی فوجی ہلاک اور 5 زخمی ہوگئے۔حزب اللہ نے شمالی اسرائیل میں کم از کم پانچ رہائشی علاقوں پر بمباری کا بھی اعلان کیا۔ اس کے علاوہ اسی علاقے میں فوجی مقامات اور جنوبی لبنان میں فوجیوں کے مراکز کو نشانہ بنایا۔ اس نے پے در پے بیانات میں کہا کہ اس نے صبح سے حیفا شہر کے شمال میں کریوت کے علاوہ کریات شمونہ، متسوفا، جعتون اور یسود ھمعلاہ پر میزائلوں سے بمباری کی ہے۔ اسرائیلی فوج نے بتایا کہ ہفتہ کے روز اسرائیل پر تقریباً 150 پروجیکٹائل فائر کیے گئے ہیں۔یہ کارروائیاں اسرائیلی فورسز کی جانب سے جنوبی لبنان کے جنوبی دیہاتوں کو بوبی ٹریپ کرنے اور اڑا دینے کے بعد سامنے آئی ہیں۔ اسرائیلی فوج نے ملک کے جنوب میں واقع دیر سریان اور العدیسہ قصبوں میں بڑے پیمانے پر بوبی ٹریپنگ کی اور بمباری کی کارروائیاں کیں۔اسرائیلی بمباری سے زمین لرز اٹھی اور قریبی قصبوں کے رہائشیوں نے بھی دھماکوں کو محسوس کیا اور خیال کیا جیسے زلزلہ آگیا ہو۔ یاد رہے جمعہ کو اسرائیلی فوج نے اعلان کیا تھا کہ گزشتہ 24 گھنٹوں کے دوران 10 افراد ہلاک اور 40 کے قریب زخمی ہوئے۔ لبنان میں وزارت صحت کے اعداد و شمار کی بنیاد پر اسرائیلی حملوں میں لبنان میں کم از کم 1580 افراد جاں بحق ہوچکے ہیں۔
