National

شہر حیدرآباد میں رمضان کی رونقیں، بازاروں میں خریداری عروج پر

82views

حیدرآباد: تاریخی شہر حیدرآباد میں رمضان کی رونقیں دیکھنے لائق ہیں۔ فرزندان توحید نمازوں، عبادات، ریاضت ، ذکر و افکار، توبہ، استغفار، دعاؤں، اور ادائیگی زکوۃ و فطرہ میں مصروف ہیں۔ لوگ اس ماہ مقدس کی ایک ایک ساعت کو قیمتی جان کر خالقِ ارض و سماں کو منانے، بندگی کا حق ادا کرنے اور زیادہ سے زیادہ تلاوت قرآن مجید میں سرگرم عمل ہیں۔

مساجد، درگاہوں، بارگاہوں اور خانقاہوں میں عبادات کے روح پرور مناظر دیکھے جا رہے ہیں۔ دوسری طرف قرآن پاک کے نزول کے اس رحمتوں، برکتوں، سعادتوں اور فضیلتوں والے بابرکت ماہ میں شہر کو خصوصیت کے ساتھ سجایا اور سنوارا گیا ہے۔ بازاروں میں خریداروں کا ہجوم دیکھنے سے تعلق رکھتا ہے۔

شہر کے بازاروں میں خریداری عروج پر ہے۔ ماقبل اور مابعد افطار کپڑوں اور دیگر سامان کی خریداری زور و شور سے جاری ہے جس کا سلسلہ رات دیر گئے تک اور پھر سحری تک بھی جاری ہے۔ بازاروں میں ہر قسم کے ملبوسات دیکھنے کو مل رہے ہیں اور کئی مقامات پر کپڑوں کے اسٹالس بھی لگائے گئے ہیں جہاں عوام کا ہجوم دیکھا جا رہا ہے۔

مختلف ورائٹیز، پروڈکٹس اور اشیا لوگوں بالخصوص خواتین کو اپنی طرف راغب کر رہی ہے۔ کئی تاجروں نے اس سال عید کی شاپنگ کے لئے لگائے گئے اسٹالس پر عوام کے ہجوم اور بہتر ردعمل پر مسرت کا اظہار کیا اور کہا کہ ان کی فروخت کافی اچھی ہو رہی ہے۔ کرتا پائجامہ، ڈریس مٹیرئیل، چکن کاری سوٹ اور ہمہ اقسام کے کپڑوں کے یہاں پر اسٹالس اور دکانات لگائی گئی ہیں جو عوام کی توجہ کا مرکز بنے ہوئے ہیں۔ ان دکانات میں بہترین ملبوسات کے بڑی تعداد میں اسٹاکس موجود ہیں۔

دوسری طرف حلیم کی بھی دھوم ہے۔ حلیم کی مختلف و مصنفین یہاں دیکھنے کو مل رہی ہیں جس کا مزہ چکھنے کے لئے ریاست کے مختلف مقامات سے لوگ پرانے شہر حیدرآباد کا رخ کر رہے ہیں۔ یہاں کی حلیم کافی مشہور ہے۔ پستہ ہوز، شاہ غوث اور دیگر ہوٹلوں کی حلیم کا کاروبار کافی عروج پر پہنچ گیا ہے۔ عصر کے بعد سے ہی لوگ حلیم خریدنے کے لئے ان ہوٹلوں کا رخ کر رہے ہیں جس سے سڑکوں پر ٹریفک جام بھی ہو رہا ہے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.