مدھیہ پردیش میں لوک سبھا انتخابات کے دوسرے مرحلے کے تحت چھ پارلیمانی حلقوں میں آج شام چھ بجے انتخابی مہم ختم ہونے کے ساتھ ہی انتخابی شور تھم جائے گا۔ ریاست کے چیف الیکٹورل آفیسر انوپم راجن کے مطابق ان چھ علاقوں میں ووٹنگ 26 اپریل کی صبح 7 بجے شروع ہوگی اور شام 6 بجے تک جاری رہے گی۔ ضابطوں کے مطابق انتخابی مہم ووٹنگ ختم ہونے سے 48 گھنٹے قبل یعنی آج شام 6 بجے ختم ہو جائے گی۔
انتخابی مہم ختم ہونے کے بعد انتخابی جلسے وغیرہ نہیں ہوں گے اور امیدوار گھر گھر جا کر ووٹرز سے رابطہ کر سکیں گے۔ ریاست میں دوسرے مرحلے میں ٹیکم گڑھ (ایس سی)، دموہ، کھجوراہو، ستنا، ریوا اور ہوشنگ آباد پارلیمانی حلقوں میں 26 اپریل کو ووٹنگ ہوگی۔ اس دوران ایک کروڑ گیارہ لاکھ سے زیادہ ووٹر دوسرے مرحلے کے تقریباً 80 امیدواروں کی قسمت پر الیکٹرانک ووٹنگ مشین (ای وی ایم) میں مہر لگا سکیں گے۔
اس مرحلے میں سب سے اہم سیٹ کھجوراہو کی سمجھی جا رہی ہے جہاں ریاستی صدر اور موجودہ ایم پی وشنودت شرما بی جے پی امیدوار کے طور پر مقابلہ کر رہے ہیں۔ یہاں سے میرا یادو (ایس پی) کے کاغذات نامزدگی جنہیں انڈیا الائنس کی طرف سے نامزد کیا گیا تھا، پہلے ہی منسوخ ہوچکے ہیں۔ اب یہاں کانگریس یا ایس پی کا کوئی امیدوار نہیں ہے۔ مگر انڈیا الائنس کی جانب سے یہاں سے فارورڈ بلاک کے امیدوار آر بی پرجاپتی کو متحدہ امیدوار بنانے کا اعلان کیا گیا ہے۔ اس کے علاوہ یہاں پر ایک درجن سے زائد امیدوار اب بھی میدان میں ہیں جن میں سے زیادہ تر آزاد ہیں۔
