جھارکھنڈ میں پیٹرول، ڈیزل اور ایل پی جی کی فراہمی مکمل طور پر مستحکم

پی آئی بی اور او ایم سیز کی پریس کانفرنس ;گھبراہٹ میں خریداری سے بچنے کی اپیل

جدید بھارت نیوز سروس
رانچی، 23 اپریل (پی آئی بی): جھارکھنڈ میں پیٹرولیم مصنوعات اور ایل پی جی کی صورتحال پر پی آئی بی رانچی اور آئل مارکیٹنگ کمپنیوں (OMCs) کی جانب سے آج نامکوم، رانچی میں واقع انڈین آئل کارپوریشن لمیٹڈ (IOCL) کے ڈویژنل دفتر میں ایک پریس کانفرنس کا اہتمام کیا گیا۔ اس موقع پر ریاست میں پیٹرول، ڈیزل اور ایل پی جی کی دستیابی اور تقسیم کے نظام سے متعلق تفصیلی معلومات فراہم کی گئیں۔صحافیوں سے خطاب کرتے ہوئے پیٹرولیم کمپنیوں کے اسٹیٹ کوآرڈینیٹر ڈاکٹر پردیپ پال اور پی آئی بی رانچی کے دفتر کے سربراہ راجیش سنہا نے بتایا کہ جھارکھنڈ میں پیٹرول، ڈیزل اور ایل پی جی کی سپلائی کی صورتحال مکمل طور پر قابو میں ہے۔ ریاست میں موجود مضبوط انفراسٹرکچر اور موثر تال میل کے ذریعے بلا تعطل سپلائی کو یقینی بنایا جا رہا ہے۔
ریٹیل آؤٹ لیٹس اور اسٹاک کی صورتحال
ریاست میں اس وقت کل 2084 ریٹیل آؤٹ لیٹس اور 5 سپلائی ڈپو کام کر رہے ہیں۔ روزانہ اوسطاً 1750 کلو لیٹر پیٹرول اور 3450 کلو لیٹر ڈیزل فراہم کیا جا رہا ہے۔ فی الحال ریاست میں پیٹرول اور ڈیزل کا 12 دن کا وافر اسٹاک موجود ہے۔ تمام ریٹیل آؤٹ لیٹس معمول کے مطابق کام کر رہے ہیں اور فروخت پر کوئی پابندی نہیں ہے۔ شہریوں سے اپیل کی گئی ہے کہ وہ گھبراہٹ میں خریداری (Panic Buying) سے گریز کریں۔
ایل پی جی کی فراہمی اور 67.5 لاکھ صارفین
ریاست میں 591 تقسیم کاروں (ڈسٹری بیوٹرز) اور 5 بوٹلنگ پلانٹس کے ذریعے تقریباً 5.67 لاکھ صارفین کو خدمات فراہم کی جا رہی ہیں۔ روزانہ اوسطاً 80 ہزار سلنڈرز ڈیلیور کیے جا رہے ہیں۔ بھارت سرکار کی ہدایات کے مطابق کمرشل ایل پی جی کا کوٹہ 70 فیصد برقرار رکھا گیا ہے، جبکہ اسپتالوں، تعلیمی اداروں، دفاع، ریلوے اور ہوٹلوں کو ترجیح دی جا رہی ہے۔
ڈیجیٹل بکنگ میں اضافہ
ایل پی جی خدمات میں ڈیجیٹلائزیشن کو فروغ دیتے ہوئے اب 95 فیصد بکنگ ڈیجیٹل ذرائع سے ہو رہی ہے، جو دو ماہ قبل محض 70 فیصد تھی۔ اس کے علاوہ 90 فیصد معاملات میں ڈیلیوری آتھنٹیکیشن کوڈ (DAC) کی تعمیل یقینی بنائی گئی ہے۔ صارفین سے درخواست ہے کہ وہ محفوظ اور شفاف تقسیم کے لیے ڈیلیوری کے وقت DAC کوڈ ضرور شیئر کریں۔
پی این جی نیٹ ورک کی توسیع
ریاست میں پی این جی کنکشنز کی تعداد 41 ہزار تک پہنچ گئی ہے، جس میں گزشتہ ایک ماہ کے دوران 4000 نئے کنکشنز کا اضافہ ہوا ہے۔ حکومت پائپ لائن بچھانے کے لیے تیز رفتار منظوری دے رہی ہے تاکہ شہری علاقوں میں سلنڈرز پر انحصار کم ہو سکے۔
افواہوں پر دھیان نہ دیں
پریس کانفرنس میں واضح کیا گیا کہ ضلعی انتظامیہ اور آئل کمپنیوں کے درمیان روزانہ رابطہ میٹنگز ہو رہی ہیں۔ شہریوں سے درخواست ہے کہ وہ افواہوں پر دھیان نہ دیں اور نہ ہی گمراہ کن خبریں پھیلائیں۔ آئل مارکیٹنگ کمپنیاں اس بات کی ضمانت دیتی ہیں کہ ریاست میں ایندھن کی فراہمی پوری طرح مستحکم ہے اور عوام کو کسی قسم کی پریشانی نہیں ہونے دی جائے گی۔اس موقع پر ایچ پی سی ایل، بی پی سی ایل اور آئی او سی ایل کے سینئرافسران سمیت ضلعی انتظامیہ کے نمائندے بھی موجود تھے۔