سرکاری ملازمین کے لیے اب ملک بھر میں ’کیش لیس‘علاج کی سہولت

وزیرِ صحت کا بڑا اعلان؛ ابوا کارڈ کی حد 5 لاکھ سے بڑھا کر 15 لاکھ روپے کی گئی

جدید بھارت نیوز سروس
رانچی ، 23 ؍اپریل : جھارکھنڈ حکومت نے صحت کے شعبے میں ایک تاریخی پہل کرتے ہوئے اسٹیٹ ایمپلائی ہیلتھ انشورنس اسکیم (راجیہ کرمی سواستھیہ بیما یوجنا) کے تحت نئی بیمہ مدت کے لیے ایک اہم معاہدے (MoU) پر دستخط کیے ہیں۔ اس نئے نظام کے نفاذ کے بعد ریاست کے ملازمین اور ان کے لواحقین کو ملک بھر کے ممتاز اور سپر اسپیشلٹی اسپتالوں میں بہتر، آسان اور مکمل طور پر کیش لیس علاج کی سہولت ملے گی۔ اس اسکیم کے تحت ریاست کے تقریباً 200 اسپتالوں سمیت ملک بھر کے قریب 600 اسپتالوں کو جوڑا گیا ہے۔ ان میں ویلور، چنئی، دہلی، حیدرآباد اور بنگلور کے بڑے طبی ادارے شامل ہیں۔ CGHS نرخوں پر علاج یقینی ہونے سے طبی اخراجات میں کمی آئے گی اور شفافیت بڑھے گی۔اسکیم کے تحت OPD، فالو اپ، ادویات کے اخراجات، ٹریول الاؤنس (TA)، آیوش علاج، میڈیکل ایڈوانس اور ضرورت کے مطابق ریوالونگ فنڈ جیسی سہولیات بھی فراہم کی جائیں گی۔ فی الحال تقریباً 2 لاکھ ملازمین اور ان کے اہل خانہ اس اسکیم سے وابستہ ہیں، جس سے کل مستفید ہونے والوں کی تعداد 7 لاکھ سے تجاوز کر گئی ہے۔ گزشتہ سال اس اسکیم کے تحت 10257 مریضوں کا علاج کیا گیا، جس پر تقریباً 51 کروڑ روپے خرچ ہوئے۔اس موقع پر وزیر صحت ڈاکٹر عرفان انصاری نے کہا کہ یہ اسکیم محض ایک معاہدہ نہیں بلکہ ریاستی ملازمین کی صحت کے تحفظ کا عہد ہے۔ انہوں نے بتایا کہ محدود آمدنی کی وجہ سے ملازمین سنگین بیماری کے وقت مالی بحران کا سامنا کرتے ہیں، اسی بات کو مدنظر رکھتے ہوئے اس اسکیم کو نئی شکل میں نافذ کیا گیا ہے۔نئے نظام میں لامحدود کیش لیس سہولت، بڑے اسپتالوں کی وسیع شرکت اور شفاف عمل کو یقینی بنایا گیا ہے۔ انہوں نے یہ بھی بتایا کہ جھارکھنڈ ملک کی پہلی ایسی ریاست بن رہا ہے جہاں تمام ملازمین کو ہیلتھ انشورنس کارڈ فراہم کیے جا رہے ہیں، جس کا فائدہ ان کے پورے خاندان کو ملے گا۔اسکیم کا دائرہ کار بڑھاتے ہوئے وکلاء، IAS-IPS افسران، سابق اراکین اسمبلی اور سابق اراکین پارلیمنٹ کو بھی اس میں شامل کیا گیا ہے۔عام لوگوں کے لیے بھی بڑی راحت دیتے ہوئے “ابوا کارڈ” اسکیم کے تحت ہیلتھ انشورنس کی رقم 5 لاکھ روپے سے بڑھا کر 15 لاکھ روپے کر دی گئی ہے۔وزیر صحت نے کہا، “ریاست کے ہر ایک شہری کی صحت کی ذمہ داری حکومت کی ہے۔ ہمارا مقصد صرف اسکیم نافذ کرنا نہیں بلکہ ہر فرد تک معیاری طبی سہولیات پہنچانا ہے۔”انہوں نے مزید بتایا کہ ریاست میں میڈیکل کالجوں کی توسیع، میڈیکو سٹی کا قیام، میڈیکل سیٹوں میں اضافہ اور ریمز-2 جیسے بڑے پروجیکٹس پر تیزی سے کام کیا جا رہا ہے، تاکہ مستقبل میں لوگوں کو علاج کے لیے ریاست سے باہر نہ جانا پڑے۔یہ نئی ہیلتھ انشورنس اسکیم نہ صرف علاج کو آسان بنائے گی بلکہ ملازمین کے مالی بوجھ کو بھی کم کرے گی اور ریاست کے صحت کے نظام کو مضبوط بنائے گی۔پروگرام کے اختتام پر جھارکھنڈ اسٹیٹ آروگیہ سوسائٹی کی ایڈیشنل ایگزیکٹو ڈائریکٹر سیما سنگھ نے شکریہ ادا کیا۔پروگرام میں نیشنل ہیلتھ مشن (NHM) کے مشن ڈائریکٹر ششی پرکاش جھا، آیوشمان بھارت ڈیجیٹل مشن (ABDM) کے اسٹیٹ مشن ڈائریکٹر ودیا نند شرما پنکج، اے اے جی آشوتوش آنند، ڈی آئی سی ڈاکٹر سدھارتھ سانیال سمیت ملازمین کی 33 فیڈریشنوں اور مختلف انجمنوں کے نمائندے، ایسوسی ایشن آف ہیلتھ پرووائیڈرز آف انڈیا کے نمائندے، مختلف بورڈز اور کارپوریشنز کے نمائندے، ٹاٹا اے آئی جی کے نمائندے، یونیورسٹیوں کے نمائندے اور محکمہ صحت کے سینئرافسران اور ملازمین موجود تھے۔