![](https://jadeedbharat.com/wp-content/uploads/2023/10/Ajay-Jadeja-e1696337300343.webp)
کابل، 3 اکتوبر (ہ س)۔ سابق بھارتی بلے باز اجے جڈیجا کو آئی سی سی مینز کرکٹ ورلڈ کپ 2023 کے لیے افغانستان کرکٹ ٹیم کا مینٹور مقرر کیا گیا ہے۔اجے جڈیجا نے 1992 سے 2000 تک بھارت کے لیے 15 ٹیسٹ میچ کھیلے ہیں، جس میں انہوں نے 26.18 کی اوسط سے 4 نصف سنچریوں اور 96 رنوں کے بہترین اسکور کے ساتھ 576 رن بنائے ہیں۔ انہوں نے اس عرصے کے دوران 196 ایک روزہ بین الاقوامی مقابلوں (او ڈی آئی) میں ہندوستان کی نمائندگی بھی کی ہے۔ انہوں نے اس فارمیٹ میں 6 سنچریوں اور 30 نصف سنچریوں کی مدد سے 37.47 کی اوسط سے 5359 رن بنائے ہیں۔وہ 111 فرسٹ کلاس اور 291 لسٹ اے گیمز کا بھی حصہ رہے ہیں اور کھیل کے دونوں فارمیٹس میں 31 سنچریوں اور 88 نصف سنچریوں کے ساتھ ہر فارمیٹ میں 8000 سے زیادہ رن بنائے ہیں۔ اس وقت افغانستان کی کرکٹ ٹیم ورلڈ کپ کی تیاریوں کے لیے بھارت میں ہے۔ تاہم پریکٹس گیمز کے ابتدائی مراحل میں ان کی تیاریوں میں اس وقت رکاوٹ پیدا ہوئی جب جنوبی افریقہ کے خلاف ان کا میچ تھرواننت پورم میں شدید بارش کی وجہ سے منسوخ کر دیا گیا۔ ایک گیند بھی نہیں پھینکی گئی۔ افغانستان اپنا آئی سی سی مینز کرکٹ ورلڈ کپ وارم اپ میچ (آج) منگل کو سری لنکا کے خلاف گوہاٹی میں کھیلے گا اور وہ 7 اکتوبر کو دھرم شالہ میں بنگلہ دیش کے خلاف ورلڈ کپ مہم کا آغاز کرے گا۔ افغانستان کی ٹیم درج ذیل ہے: حشمت اللہ شاہدی، ابراہیم زدران، رحمان اللہ گرباز، رحمت شاہ، ریاض حسن، نجیب اللہ زدران، محمد نبی، اکرام علی خیل، عظمت اللہ عمرزئی، راشد خان، عبدالرحمن، نور احمد، مجیب الرحمان، فضل الحق، فاروقی – نوین الحق ریزرو، گلبدین نائب، شرف الدین اشرف، فرید احمد۔
![Follow us on Google News](https://jadeedbharat.com/wp-content/uploads/2024/01/GoogleNews.png)