مہاراشٹر کے جلگاؤں میں دو گروپوں میں پرتشدد تصادم

کئی گاڑیاں نذر آتش ؛ پالادھی گاؤں میں کرفیو نافذ

جلگاؤں، یکم جنوری:۔ (ایجنسی) مہاراشٹر کے پالادھی گاؤں میں منگل کی دیر رات معمولی بات پر دو گروپوں کے درمیان تصادم کے بعد تین سے چار گاڑیوں کو آگ لگا دی گئی۔ شرپسندوں نے کچھ دکانوں کو بھی آگ لگا دی۔ صورتحال کو دیکھتے ہوئے یہاں کرفیو نافذ کر دیا گیا ہے۔ اس معاملے میں 20 سے 25 نامعلوم افراد کے خلاف مقدمہ درج کیا گیا ہے۔پولیس افسر کویتا نیرکر نے کہا کہ 31 دسمبر کی رات وزیر گلاب راؤ پاٹل کی گاڑی کے ٹکرانے کے بعد لڑائی شروع ہوئی۔ اس دوران دونوں گروپ آمنے سامنے آگئے۔ تاہم اس دوران وزیر گلاب راؤ پاٹل گاڑی میں نہیں تھے۔ بلکہ گلاب راؤ پاٹل کی بیوی کار میں سفر کر رہی تھی۔ دو گروپوں کے درمیان جھگڑے کے بعد شرپسندوں نے 12:30 سے 1 بجے کے درمیان گیراج کے سامنے کھڑی تین- چار چار پہیوں والی گاڑیوں کو آگ لگا دی۔ واقعہ کی اطلاع ملتے ہی گیراج میں کام کرنے والے ملازمین موقع پر پہنچ گئے اور گاڑیوں میں لگی آگ کو بجھانے کی کوشش کی۔ پولیس اہلکاروں کو بھی گاڑیوں کو آگ لگانے کے واقعہ کی اطلاع دیر سے ملی۔ اس دوران شرپسندوں نے دو تین دکانوں کو آگ لگا دی۔ بتایا جاتا ہے کہ اس دوران کچھ دکانوں میں توڑ پھوڑ اور نقصان پہنچایا گیا۔ تاہم جب تک فائر بریگیڈ کی گاڑیاں موقع پر پہنچیں، گاڑیاں اور دکانیں جل کر راکھ ہو چکی تھیں۔ واقعہ کے بعد گاؤں میں امن ہے لیکن بڑی تعداد میں پولیس فورس تعینات کر دی گئی ہے۔ واقعہ کے پیش نظر پولیس نے گاؤں میں کرفیو کا اعلان کر دیا۔ گاؤں میں دفعہ 144 کے ساتھ کرفیو نافذ کر دیا گیا ہے۔ اس کے علاوہ پالادھی تھانے میں رات گئے تک مقدمات درج کرنے کا کام جاری تھا۔