National

چنڈی گڑھ کے نو منتخب میئر نے سپریم کورٹ میں سماعت سے قبل ہی استعفیٰ دے دیا، عآپ کے 3 کونسلر بی جے پی میں شامل

52views

چنڈی گڑھ میونسپل کارپوریشن میں ایک نیا موڑ اس وقت آ گیا جب بی جے پی  کے منوج سونکر نے اتوار(18 فروری) کی رات چنڈی گڑھ کے میئر کے عہدے سے استعفیٰ دے دیا ہے۔ انہوں نے اپنا استعفیٰ ایسے وقت دیا ہے جب آج (19 فروری) کو میئر کے انتخاب میں ہوئی مبینہ دھاندلی کے معاملے کی سپریم کورٹ میں سماعت ہونے والی ہے۔ لیکن اسی کے ساتھ یہ بھی ہوا کہ عآپ کے 3 کونسلروں نے بی جے پی میں شمولیت اختیار کرلی۔

چندی گڑھ بی جے پی کے صدر جتیندر پال ملہوترا کے مطابق ’’منوج سونکر نے میونسپل کارپوریشن کے کمشنر کو اپنا استعفیٰ پیش کر دیا ہے۔ میئر کے انتخاب کا معاملہ عدالت میں زیر التوا ہے، سپریم کورٹ اس پر فیصلہ کرے گا۔‘‘ واضح رہے کہ کانگریس اور عآپ نے میئر انتخاب کے پریزائیڈنگ آفیسر انیل مسیح پر بیلٹ پیپرز کو خراب کرنے کا الزام لگایا تھا۔ 30 جنوری کو ووٹوں کی گنتی کے دوران 8 ووٹوں کے ساتھ مسیح کی مبینہ طور پر چھیڑ چھاڑ کرتے ہوئے ایک ویڈیو بھی سوشل میڈیا پر وائرل ہوئی تھی، جس پر سپریم کورٹ نے سخت موقف اختیار کیا تھا۔

5 فروری کو سپریم کورٹ نے مسیح کی سرزنش کرتے ہوئے کہا تھا کہ ’’یہ واضح ہے کہ انہوں نے بیلٹ پیپرز کو خراب کیا ہے اور ان کے خلاف مقدمہ چلایا جانا چاہیے۔ ان کا یہ عمل جمہوریت کا قتل اور اس کا مذاق ہے۔‘‘ عدالت نے کیس کی سماعت کے لیے 19 فروری کی تاریخ مقرر کی تھی۔ دریں اثنا عآپ کے 3 کونسلر بی جے پی میں شامل ہو گئے ہیں۔ ان کونسلروں کے نام پونم دیوی، نیہا مساوت اور گروچرن کالا ہے۔ ان کا کہنا ہے کہ وہ اروند کیجریوال کی قیادت والی پارٹی پارٹی کے ساتھ خوش نہیں تھے۔

پونم دیوی نے خبر رساں ایجنسی اے این آئی سے بات کرتے ہوئے کہا کہ ’’میں نے پی ایم مودی کے کام سے متاثر ہو کر بی جے پی میں شمولیت اختیار کی ہے۔ میں نے عآپ کو اس لیے چھوڑا کہ وہ ایک جعلی پارٹی ہے۔‘‘اس کے ساتھ ہی میئر کے انتخاب کے لیے 36 رکنی کونسل میں بی جے پی کے پاس 19 ووٹوں کی اکثریت ہوگی، جب کہ عآپ اورکانگریس اتحاد کے پاس 17 ووٹ رہ جائیں گے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.