جدید بھارت نیوز سروس
پلاموں، 6 جنوری:۔ پلاموں کے چین پور تھانہ علاقہ کے گڑا گاؤں میں سنیچر کی رات پانڈے گینگ کے دو بدمعاشوں کو گھر میں گھس کر گولی مار کر ہلاک کر دیا۔ ہلاک ہونے والے دونوں بدمعاشوں کی شناخت دیپک ساو عرف دھولا اور بھرت پانڈے عرف بھرت سنگھ کے طور پر کی گئی ہے۔ گینگ کے دو ارکان انشو سنگھ اور مہاویر سنگھ زخمی بتائے جاتے ہیں۔ اطلاع ملنے کے بعد ایس پی ریشما رمیشن، ایس ڈی پی او منی بھوشن پرساد، صدر، پٹن، چین پور، ستبروا سمیت کئی تھانوں کی پولیس موقع پر پہونچ گئی۔ دونوں زخمیوں کو علاج کے لیے ایم ایم سی ایچ ہسپتال میں داخل کرایا گیا ہے۔ پولیس نے جائے وقوعہ سے 25 سے زائد گولے بھی برآمد کیے ہیں۔ قابل ذکر ہے کہ دیپک ساو اور بھرت سنگھ جھارکھنڈ پولیس کی انتہائی مطلوب فہرست میں شامل تھے۔
پانڈے گینگ سے الگ اپنا گینگ بنا لیا تھا
واقعہ کی تصدیق کرتے ہوئے ایس پی ریشما رمیشن نے کہا کہ مرنے والے دونوں بدمعاش پہلے رام گڑھ کے پانڈے گینگ میں شامل تھے۔ لیکن چند روز قبل دونوں نے گینگ سے علیحدگی اختیار کر کے الگ گینگ بنا لیا تھا۔ ان دونوں نے گینگ پر حملہ بھی کیا تھا۔ ایس پی نے کہا کہ ایسا لگتا ہے کہ یہ واقعہ آپسی رنجش کی وجہ سے انجام دیا گیا ہے۔ تاہم پولیس تمام نکات پر تفتیش کر رہی ہے۔ اصل وجوہات تحقیقات کے بعد ہی معلوم ہوں گی۔ پولیس نے جائے وقوعہ سے کئی شواہد اکٹھے کر کے ملزمان کی تلاش تیز کر دی ہے۔
