National

غیر قانونی ڈرون پکڑنے کے لیے عقابوں کا استعمال، تلنگانہ پولیس کا اقدام

49views

غیرقانونی طور پر اڑائے جانے والے ڈرونس کو پکڑنے کے لیے تلنگانہ پولیس نے ایک نیا اسکواڈ بنا یا ہے۔ یہ کوئی پولیس یا نشانہ بازوں کا اسکواڈ نہیں بلکہ عقابوں کا اسکواڈ ہے، جسے ’ایگل‘ اسکواڈ کا نام دیا گیا ہے۔ اس اسکواڈ میں تربیت یافتہ عقابوں کو شامل کیا گیا ہے جو مشکوک اور غیرقانونی طور پر اڑائے جانے والے ڈرونس کو پکڑیں گے۔

تربیت کے بعد ان عقابوں کے ذریعے ڈرونس کو پکڑنے کا کامیاب مظاہرہ کیا گیا جس کی ویڈیو جاری کی گئی ہے۔ عقابوں کو ڈرون پکڑنے کی تربیت کچھ پیشہ ورماہرین کے ذریعے دی گئی ہے۔ فی الوقت تین عقابوں کو یہ تربیت دی گئی ہے۔ تینوں عقابوں نے تلنگانہ پولیس کے اعلی عہدیداران بشمول ڈی جی پی کی موجودگی میں فضا میں اڑنے والے ڈرونس کو پکڑنے کا کامیاب مظاہرہ کیا۔ اس ایگل اسکواڈ کے قیام کا مقصد اہم ترین شخصیات کے دورہ اور عوامی پروگراموں کے دوران غیرقانونی ڈرونس کو روکنا ہے۔

تلنگانہ پولیس کا عقابی اسکواڈ ہندوستان کا پہلا اوردنیا کا دوسرا اسکواڈ ہے۔ پہلا اسکواڈ نیدرلینڈ میں بنایا گیا تھا تاکہ ڈرونس کے خطرات سے نمٹاجاسکے۔ دو عقاب جن کی عمر دو سال ہے، انہیں کسی بھی شئے پر نگرانی اور اس کو پکڑنے کی کامیاب تربیت دی گئی ہے۔ ساتھ ہی ایک عقاب کو ہائی کوالٹی امیجنگ کیمرہ بردار بھی بنایا گیا ہے۔ ان عقابوں کو روزانہ کئی گھنٹوں کی تربیت دی گئی جس کے نتیجے میں انہوں نے کامیابی کے ساتھ ڈرونس کو پکڑنا سیکھ لیا۔ تلنگانہ پولیس میں مزید ایگل اسکواڈ یونٹ کے قیام کے لئے منصوبہ تیار کیا جا رہا ہے تاکہ ڈرونس کے خطرہ سے نمٹا جاسکے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.