صدر جمہوریہ دروپدی مرمو نے ویشنو دیوی بھون میں جدید سہولتوں سے لیس دو پروجیکٹوں کا آغاز کیا
صدرجمہوریہ دروپدی مرمو نے آج جموں کشمیر کے رِیاسی ضلعے میں تری کُوٹا ہلس میں واقع شری ماتا ویشنو دیوی بھون میں دو اہم پروجیکٹوں کا افتتاح کیا۔ جموں کے ہمارے نامہ نگار نے خبر دی ہے کہ صدر جمہوریہ لیفٹیننٹ گورنر منوج سنہا کے ہمراہ ماتا ویشنو دیوی بھون پہنچیں جہاں اُن کا شری ماتا ویشنو دیوی شرائن بورڈ کے سی ای او انشل گرگ نے استقبال کیا۔ صدرجمہوریہ نے شرائن بورڈ کی طرف سے بھون میں تعمیر کئے گئے دو بڑے پروجیکٹوں اسکائی واک اور پاروتی بھون کا افتتاح کیا۔ اسکائی واک کی بدولت بھون کی طرف سے جانے اور درشن کے بعد واپس لوٹنے کیلئے الگ الگ راستے فراہم ہوں گے اور یوں بھیڑبھاڑ ہونے کا احتمال ختم ہوگا۔ 31 دسمبر 2021کو وہاں بھگدڑ مچنے سے 12 افراد کی موت ہوگئی تھی اور 16 دیگر زخمی ہوگئے تھے۔ اسکائی واک جدید ترین سہولتوں سے لیس ہے۔ صدر جمہوریہ نے پاروتی بھون کا بھی افتتاح کیا جہاں 15 ہزار لاکرس ہیں جن میں روزانہ کی بنیاد پر دس سے 15 ہزار شردھالو نہانے کے علاوہ اپنا سامان سفر جمع کراسکتے ہیں۔ صدر جمہوریہ نے ماتا ویشنو دیوی کی پوتّر گپھا میں پوجا ارچنا بھی کی۔ صدر جمہوریہ دروپدی مرمو نے کل کشمیر یونیورسٹی کے 20 ویں جلسہ تقسیم اسناد سے خطاب کیا تھا اور اسکالروں کو میڈل اور ڈگریاں عطا کی تھیں۔ انہوں نے کہا یہ بڑے فخر کی بات ہے کہ کشمیر یونیورسٹی میں اندراج شدہ تقریباً 55 فیصد طلبا لڑکیاں ہیں۔ صدرجمہوریہ جموں وکشمیر کے دو روزہ دورے پر ہیں اور وہ پروجیکٹوں کے افتتاح اور دیوی کے درشن کے بعد نئی دلی کے لئے واپس روانہ ہوں گی۔
