National

بھارت نے لڑائی سے متاثرہ اسرائیل سے اپنے شہریوں کو واپس لانے کیلئے آپریشن اَجے کا آغاز کیا

189views

بھارت نے اسرائیل سے اپنے وطن واپس آنے کے خواہشمند شہریوں کو سہولت فراہم کرنے کے لیے آپریشن اَجے کا آغاز کیا ہے۔ ایک سوشل میڈیا پوسٹ میں وزیر خارجہ ڈاکٹر ایس جے شنکر نے کہا کہ اس سلسلے میں خصوصی چارٹر پروازوں کے بندوبست کے علاوہ دیگر انتظامات کیے جا رہے ہیں۔ انھوں نے کہا کہ حکومت بیرونِ ملک مقیم بھارتی شہریوں کی حفاظت، سلامتی اور بہتری کے لیے پوری طرح عہد بستہ ہے۔ اسرائیل میں واقع بھارتی سفارتخانے نے کہا ہے کہ اُس نے آج کی خصوصی پرواز کے لیے رجسٹرڈ بھارتی شہریوں کی پہلی فہرست بذریعہ ای میل بھیج دی ہے۔ اُس نے مزید کہا ہے کہ دیگر رجسٹرڈ افراد کو بھی پیغامات آنے والی پروازوں کے لیے بھیجے جائیں گے۔ بھارتی سفارتخانے نے مزید کہا ہے کہ وہ 24 گھنٹے کام کرنے والی ہیلپ لائن کے ذریعے اسرائیل میں بھارتی شہریوں کو مدد فراہم کرنے کے لیے مسلسل کام کررہا ہے۔ اُس نے لوگوں سے زور دے کر کہا ہے کہ وہ مطمئن اور چوکس رہیں اور سیکیورٹی ایڈوائزری پر عمل کریں۔ اسرائیل اور فلسطین کے موجودہ حالات کے تناظر میں وزارتِ خارجہ میں حالات کی نگرانی کرنے، شہریوں کو معلومات اور مدد فراہم کرنے کیلئے چوبیس گھنٹے کام کرنے والا ایک کنٹرول روم قائم کیا گیا ہے۔ رملّہ میں بھارت کی نمائندگی کرنے والے دفتر نے بھی چوبیس گھنٹے کام کرنے والی ایمرجنسی ہیلپ لائن قائم کی ہے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.