West Bengal

آسنسول سے بی جے پی کا ٹکٹ ٹھکرانے والے پون سنگھ نے کاراکاٹ لوک سبھا سیٹ سے انتخاب لڑنے کا کیا اعلان

148views

بھوجپوری فلم انڈسٹری کی مشہور شخصیت گلوکار و اداکار پون سنگھ بہار کی کاراکاٹ لوک سبھا سیٹ سے انتخاب لڑنے کا اعلان کر کے آج سبھی کو حیران کر دیا۔ پون سنگھ کو بی جے پی نے مغربی بنگال کی آسنسول لوک سبھا سیٹ سے ٹکٹ دیا تھا، لیکن انھوں نے وہاں سے انتخاب نہ لڑنے کا اعلان کر دیا تھا۔ نتیجہ کار بی جے پی کو وہاں سے اپنا امیدوار بدلنا پڑا۔ اب پون سنگھ کے ذریعہ کاراکاٹ سے انتخابی میدان میں اترنے کا فیصلہ سیاسی گرمی کو بڑھانے والا ہے۔ ایسا اس لیے کیونکہ انھوں نے یہ نہیں بتایا ہے کہ وہ کس پارٹی کی طرف سے امیدوار بنیں گے۔

دراصل پون سنگھ نے آج سوشل میڈیا پلیٹ فارم ’ایکس‘ پر ایک پوسٹ کیا ہے جس میں لکھا ہے کہ ’’ماں اس زمین پر سب سے زیادہ وزن دار ہوتی ہیں اور میں نے اپنی ماں سے وعدہ کیا تھا کہ میں اس بار انتخاب لڑوں گا۔ میں نے فیصلہ کیا ہے کہ میں 2024 کا لوک سبھا انتخاب کاراکاٹ، بہار سے لڑوں گا۔ جئے ماتا دی۔‘‘

یہاں غور کرنے والی بات یہ ہے کہ کاراکاٹ لوک سبھا سیٹ سے این ڈی اے میں شامل راشٹریہ لوک مورچہ (آر ایل ایم) نے اوپیندر کشواہا کو امیدوار بنایا ہے۔ ایسے میں اگر پون سنگھ بی جے پی کی طرف سے امیدوار بنائے جاتے ہیں تو اوپیندر کشواہا کی ناراضگی بڑھ سکتی ہے۔ آر ایل ایم کو این ڈی اے نے محض 1 سیٹ ہی دی ہے، ایسے میں دیکھنے والی بات یہ ہوگی کہ پون سنگھ بطور آزاد امیدوار میدان میں اتریں گے، یا پھر بی جے پی سے کنارہ لے کر کسی دیگر پارٹی کا دامن تھامیں گے۔

کاراکاٹ لوک سبھا سیٹ سے فی الحال جنتا دل یو کے مہابلی کشواہا رکن پارلیمنٹ ہیں۔ انھوں نے 2019 لوک سبھا انتخاب میں آر ایل ایس پی امیدوار اپیندر کشواہا کو شکست دی تھی۔ اس بار مہابلی کشواہا کو یہاں سے ٹکٹ نہیں ملا ہے۔ اس سیٹ سے سی پی آئی-ایم ایل نے راجہ رام سنگھ کشواہا کو اور ایم آئی ایم آئی ایم نے پرینکا چودھری کو امیدوار بنایا ہے۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.