اترکاشی میں برف باری کے آثار؛ سرنگ میں پھنسے مزدوروں کے انتظار میں اضافہ

اترکاشی، 26 نومبر :۔ اتراکھنڈ کے اترکاشی ضلع میں 12 نومبر سے زیر تعمیر سلکیارا ٹنل میں پھنسے 41 مزدوروں کو بچانے کا بے صبری سے انتظار ہے۔ ہر بار آگر مشین راحت اور بچاو کے کام میں پہاڑ کے سامنے ہتھیار ڈال رہی ہے۔ یہ مہم کا 15 واں دن ہے۔ اب ورٹیکل ڈرلنگ کی تیاریوں کی بات ہو رہی ہے۔ دریں اثنا محکمہ موسمیات نے اگلے 36 گھنٹوں میں اترکاشی اور ردرپریاگ میں برف باری کی وارننگ دی ہے۔ دریں اثنا مزدوروں کو باہر نکالنے کے لیے بنائی گئی 32 انچ کی پائپوں کے ذریعہ تقریباً 48 میٹر کی سرنگ میں سلاخوں میں پھنسی آگر مشین کے بلیڈ کو کاٹنے کا کام جاری ہے۔ حیدرآباد سے پلازما کٹر کی آج آمد کے بعد بچاو کے کام میں تیزی آنے کی امید ہے۔ مشین کا ایک اور اہم حصہ جو ڈرلنگ کرتا ہے سرنگ کے اوپر لے جایا جا رہا ہے۔ ٹیم کا کہنا ہے کہ کام جاری ہے اور جلد ہی دوسرا پارٹ بھی پہنچا دیا جائے گا۔
کچھ حکام نے کہا کہ ورٹیکل ڈرلنگ پیر سے شروع ہو سکتی ہے۔ لیکن سرنگ کے دروازے پر رس رہے پانی نے سب کی پریشانی بڑھا دی۔ ہفتہ کو پانی ٹپک رہا تھا۔ حکام اسے ایک عام واقعہ قرار دے رہے ہیں، اس میں زیر تعمیر سرنگ کے بالائی علاقے میں 82 میٹر کے فاصلے پر کھدائی کی جائے گی۔ اس کے لیے مشین کا پلیٹ فارم تیار کر لیا گیا ہے۔ مشین کا ایک حصہ بھی وہاں پہنچا دیا گیا ہے۔