’صرف الیکشن جیتنا کافی نہیں ہے‘:مایاوتی نے بی ایس پی کے ارکان پارلیمنٹ  کو دیا بڑا پیغام

اتر پردیش میں گزشتہ چند دنوں کے دوران مختلف میڈیا رپورٹس میں بی ایس پی ارکان  پارلیمنٹ کے بارے میں کئی دعوے کئے گئے ہیں۔ ان میڈیا رپورٹس میں پارٹی کے آدھے سے زیادہ  ارکان پارلیمنٹ کے دیگر پارٹیوں میں شامل ہونے کی بات کی جا رہی ہے۔ کچھ رپورٹس میں بی ایس پی کے تمام ارکان پارلیمنٹ  کی طرف سے بغاوت کے اشارے ملے ہیں۔ لیکن طویل عرصے میں پہلی بار مایاوتی نے اس معاملے پر اپنی خاموشی توڑی اور سخت تبصرہ کیا اور واضح پیغام دیا۔

مایاوتی نے کہا، ‘امیدواروں کا انتخاب بہت سوچ سمجھ کر کیا جانا چاہئے جیسا کہ یوپی کے تناظر میں بہت احتیاط کے ساتھ کیا جا رہا ہے۔ پارٹی امیدواروں کے لیے صرف الیکشن جیتنا ہی کافی نہیں ہے، بلکہ انتخابات کے بعد بھی ان کے لیے بی ایس پی پارٹی اور تحریک کے تئیں وفادار، نظم و ضبط اور محنتی رہنا ضروری ہے۔ انہوں نے اب مستقبل میں امیدواروں کے انتخاب کے حوالے سے پارٹی کا موقف واضح کر دیا ہے۔

بی ایس پی سربراہ نے اتراکھنڈ کے سینئر پارٹی عہدیداروں کے ساتھ میٹنگ کے بعد میڈیا کو معلومات دیتے ہوئے اپنے خیالات کا اظہار کیا۔ اس سے پہلے، بی ایس پی کی قومی صدر مایاوتی نے ہفتہ کو رویداس جینتی پر مبارکباد دی۔ انہوں نے یہ بھی کہا کہ سیاسی فائدے کے لیے ان کے سامنے جھکنے والوں سے محتاط رہنا ضروری ہے۔