کیرالہ میں بزرگوں کیلئے خصوصی وزارت کا تاریخی فیصلہ

ستیسن حکومت کا حلف لیتے ہی خواتین کیلئے مفت بس سفر اور تنخواہوں میں اضافہ

تھرواننت پورم، 18 مئی:۔ (ایجنسی) کیرالہ کے نومنتخب وزیر اعلیٰ وی ڈی ستیسن نے حلف برداری کے فوراً بعد کابینہ کی پہلی ہی میٹنگ میں ریاست کے عوام کے لیے چار بڑے اور تاریخی اعلانات کر دیے ہیں۔ یو ڈی ایف (UDF) حکومت کے ان فیصلوں کو انتخابی وعدوں کی تکمیل کی سمت میں ایک بڑا قدم مانا جا رہا ہے۔ ان فیصلوں میں سب سے اہم اور منفرد فیصلہ بزرگ شہریوں کے لیے ایک الگ اور خصوصی وزارت؍محکمہ قائم کرنے کا ہے، جسے وزیر اعلیٰ نے ہندوستان میں اپنی نوعیت کا پہلا قدم قرار دیا ہے۔ انہوں نے کہا کہ کسی بھی مہذب سماج کا اندازہ اس بات سے ہوتا ہے کہ وہ اپنے بزرگوں کے ساتھ کیسا برتاؤ کرتا ہے، اور کیرالہ اس معاملے میں ایک مثال بنے گا۔ حکومت کی جانب سے جاری کردہ تفصیلات کے مطابق، دوسرا بڑا فیصلہ خواتین کے لیے کے ایس آر ٹی سی (KSRTC) بسوں میں مفت سفر کی سہولت فراہم کرنا ہے، جس کی تفصیلی گائیڈ لائنز جلد جاری کی جائیں گی۔ اس کے علاوہ، سکریٹریٹ کے سامنے طویل عرصے سے احتجاج کرنے والی آشا ورکرز کی مانگوں کو پورا کرتے ہوئے ان کے ماہانہ اعزازیہ میں 3,000 روپے کا یکمشت اضافہ کیا گیا ہے۔ چوتھے بڑے فیصلے کے تحت آنگن واڑی ورکرز، پری پرائمری اساتذہ، اسکولوں کے باورچی عملے اور ہیلپرز کی تنخواہوں میں بھی 1,000 روپے ماہانہ کا اضافہ منظور کیا گیا ہے۔ کانگریس نے اپنے آفیشل سوشل میڈیا ہینڈل پر ان فیصلوں کو شیئر کرتے ہوئے لکھا ہے کہ “ہم جو کہتے ہیں، وہ کر دکھاتے ہیں”۔ یہ تمام اعلانات بلا تعطل نافذ کیے جا رہے ہیں۔