جرمن ہم منصب بورس پسٹوریئس سے ملاقات کریں گے
میونخ۔ 21 ؍ اپریل۔ ایم این این۔وزیر دفاع راج ناتھ سنگھ منگل کو دونوں ممالک کے درمیان دفاعی تعاون کو آگے بڑھانے پر تبادلہ خیال کرنے جرمنی پہنچے۔جرمنی میں ہندوستان کے سفیر اجیت گپتے نے میونخ ہوائی اڈے پر ان کا استقبال کیا۔جرمنی میں ہندوستانی سفارت خانے نے ایکس پر ایک پوسٹ میں کہا کہ “یہ دورہ بھارت۔جرمنی کے دفاعی تعاون کو آگے بڑھانے کے لیے اہم ہے، جس میں صنعتی تعاون، فوجی مشغولیت اور ابھرتے ہوئے شعبوں جیسے سائبر، AI اور ڈرونز پر توجہ دی جائے گی۔”اپنے دورے کے دوران راج ناتھ سنگھ اپنے جرمن ہم منصب بورس پسٹوریئس اور حکومت کے دیگر سینئر لیڈروں سے بات چیت کرنے والے ہیں۔وزارت دفاع کے مطابق، بات چیت میں دفاعی صنعتی تعاون بڑھانے، ملٹری سے ملٹری مصروفیات کو مضبوط بنانے اور سائبر سیکیورٹی، مصنوعی ذہانت اور ڈرون جیسے ابھرتے ہوئے شعبوں میں مواقع تلاش کرنے پر توجہ دی جائے گی۔دونوں وزراء کی موجودگی میں یو این پیس کیپنگ آپریشنز ٹریننگ میں تعاون کے لیے دفاعی صنعتی تعاون کے روڈ میپ اور نفاذ کے انتظامات پر دستخط کیے جانے کا امکان ہے۔وزارت دفاع کے بیان میں کہا گیا، “یہ دورہ دفاعی تعاون کے جاری اقدامات کا جائزہ لینے اور دونوں ممالک کی دفاعی صنعتوں کے درمیان تعاون کے لیے نئی راہوں کی نشاندہی کرنے کا موقع فراہم کرے گا۔ جناب راجناتھ سنگھ سے جرمن دفاعی صنعت کے اہم نمائندوں کے ساتھ بات چیت کی بھی توقع ہے، تاکہ میک ان انڈیا پہل کے تحت مشترکہ ترقی اور مشترکہ پیداوار کو فروغ دیا جا سکے۔” وزارت دفاع کے بیان میں کہا گیا ہے۔
