دو طرفہ تعلقات کا جامع جائزہ، تعاون بڑھانے پر اتفاق
نئی دہلی۔9؍ اپریل۔ ایم این این۔بھارت اور ترکیہ کے درمیان 12ویں دور کے خارجہ دفتر مشاورتی مذاکرات نئی دہلی میں منعقد ہوئے، جہاں دونوں ممالک نے دو طرفہ تعلقات کا تفصیلی جائزہ لیا اور مختلف شعبوں میں تعاون کو مزید فروغ دینے پر اتفاق کیا۔ بھارتی وزارت خارجہ کے مطابق اس اجلاس کی صدارت بھارت کی جانب سے سیکریٹری (مغرب( شبی جارج جبکہ ترکیہ کی جانب سے نائب وزیر خارجہ بیرِش ایکنچی نے کی۔ اس سے قبل ایسے مذاکرات کا آخری دور جون 2022 میں انقرہ میں منعقد ہوا تھا۔ مذاکرات کے دوران دونوں فریقین نے تجارت، سرمایہ کاری، سیاحت، ٹیکنالوجی اور اختراعات، توانائی، تعلیمی و ثقافتی تعاون اور عوامی روابط سمیت مختلف شعبوں میں پیش رفت کا جائزہ لیا۔ اس کے علاوہ سرحد پار دہشت گردی کے خلاف تعاون پر بھی بات چیت کی گئی۔ دونوں ممالک نے علاقائی اور عالمی امور پر بھی تبادلہ خیال کیا، جس سے ظاہر ہوتا ہے کہ بھارت اور ترکیہ نہ صرف دو طرفہ بلکہ عالمی سطح پر بھی ایک دوسرے کے ساتھ مشاورت جاری رکھے ہوئے ہیں۔ اجلاس کے اختتام پر دونوں فریقین نے اس بات پر اتفاق کیا کہ مشاورتی مذاکرات کا اگلا دور ترکیہ میں باہمی سہولت کے مطابق منعقد کیا جائے گا، تاکہ جاری سفارتی روابط کو مزید مستحکم کیا جا سکے۔
