حلف لیتے ہی وزیراعلیٰ جوزف وجے نے نبھایا اپناوعدہ

تمل ناڈو کے ہر گھر کو 200 یونٹ مفت بجلی

چنئی ، 10 مئی (ہ س): تمل ناڈو ویتری کزگم (ٹی وی کے) کے سربراہ سی جوزف وجے نے آج حلف لینے کے بعد تمل ناڈو سکریٹریٹ میں ریاست کے وزیر اعلیٰ کا عہدہ سنبھال لیا۔ حلف اٹھانے کے بعد انہوں نے سب سے پہلے جن فائلوں پر دستخط کیے ان کا تعلق خواتین کی حفاظت کے لیے خصوصی فورس کی تشکیل اور گھریلو صارفین کو 200 یونٹ تک مفت بجلی فراہم کرنے سے تھا۔جوزف وجے نے سب سے پہلے ایک فائل پر دستخط کیے جس میں ریاست کے تمام گھرانوں کو 200 یونٹ تک مفت بجلی فراہم کرنے کا اعلان کیا گیا تھا۔ اس کے بعد انہوں نے خواتین کے تحفظ کے لیے ایک خصوصی فورس (سنگپین اسپیشل ٹاسک فورس) کی تشکیل کے حوالے سے ایک فائل پر دستخط کیے۔ وجے نے انسداد منشیات مہم اور منشیات کی روک تھام سے متعلق فائلوں پر بھی دستخط کیے۔وجے کو اس سے قبل چنئی کے جواہر لعل نہرو انڈور اسٹیڈیم میں صبح 10 بجے کے قریب تمل ناڈو کے انچارج گورنر نے وزیراعلیٰ کے عہدے اور رازداری کا حلف دلایا۔ اسٹیڈیم حامیوں اور کارکنوں کے نعروں سے گونج اٹھا۔ ان کے والد، ڈائریکٹر ایس اے چندر شیکھر اور ان کی والدہ شوبھا جذباتی ہو گئیں۔ تقریب میں خاندان کے افراد ، فلمی شخصیات اور اتحادی جماعتوں کے رہنماؤں نے بھی شرکت کی۔پہلے، وزیر اعلیٰ کا عہدہ سنبھالنے والے لیڈر عام طور پر فائلوں پر دستخط کرنے سیکریٹریٹ جاتے تھے ، لیکن وجے نے حلف اٹھاتے ہی عوام کے سامنے فائلوں پر دستخط کر دیے۔ اس میں ہر دو ماہ بعد 200 یونٹ تک مفت بجلی دینے کا اعلان کرنے والی فائل بھی شامل تھی۔ وجے نے اپنی تقریر کا آغاز یہ کہہ کر کیا، ’ان لوگوں کے لیے جو میرے دل میں رہتے ہیں …‘انہوں نے کہا ،’ میں جانتا ہوں کہ غربت کیا ہوتی ہے، میں جانتا ہوں کہ بھوک کیا ہوتی ہے، میں یہ بھی جانتا ہوں، میں کسی شاہی خاندان سے نہیں آیا، میں آپ میں سے ہوں، میں آپ کے خاندان کا فرد محسوس کرتا ہوں، میں ہمیشہ ایسا ہی محسوس کرتا ہوں، اور آپ نے مجھے اسی طرح قبول کیا ، اور اسی لیے آپ نے مجھے سینما میں اتنا بڑا مقام دیا۔‘
وجے نے کہا ، ’میں آپ کا قرض چکانے کے لیے سیاست میں آیا ہوں، پھر آپ نے مجھ سے کہا ، ’ چلو، وجے … ہم انتظام کر لیں گے۔‘ آپ نے مجھے بہت پیاردیا اور پیار سے قبول کیا۔‘وجے کی پارٹی، تملگا ویتری کزگم (ٹی وی کے) نے اپنے پہلے انتخابات میں شاندار کارکردگی کا مظاہرہ کرتے ہوئے 108 سیٹیں جیتیں اور کانگریس، وی سی کے، اور بائیں بازو کی جماعتوں کی حمایت سے 118 کے ضروری اکثریت کو عبور کیا۔ حلف برداری کی تقریب میں کانگریس لیڈر راہل گاندھی سمیت کئی اہم لیڈروں نے شرکت کی۔ تمل ناڈو کے وزیر اعلیٰ وجے نے حکومت کی تشکیل میں حمایت کے لیے کانگریس وی سی کے اور بائیں بازو کی جماعتوں کا شکریہ ادا کیا۔تمل ناڈو کے وزیر اعلیٰ وجے نے لوگوں سے اپیل کی کہ وہ انہیں کام کرنے کے لیے مناسب وقت دیں تاکہ وہ نتائج دکھا سکیں۔ انہوں نے ریاست کی مالی صورتحال پر وائٹ پیپر جاری کرنے اور مکمل شفافیت کے ساتھ آگے بڑھنے پر زور دیا۔ انہوں نے پچھلی حکومت پر ریاست پر بہت زیادہ قرضوں کا بوجھ ڈالنے کا بھی الزام لگایا اور کہا کہ وہ عوام سے جھوٹے وعدے نہیں کریں گے۔