بنگال میں ممتا کو مات، 15 سال بعد کھلا کمل؛کیرالہ میں کانگریس اتحاد کی واپسی

تمل ناڈو میں وجے کی ’ٹی وی کے‘ کا شاندار آغاز، آسام میں بی جے پی کا اقتدار برقرار

نئی دہلی، 4 مئی:۔ (ایجنسی) ہندوستان کی پانچ ریاستوں میں ہونے والے اسمبلی انتخابات کے نتائج نے ملک کی سیاسی بساط پلٹ کر رکھ دی ہے۔ رات پونے نو بجے تک کے موصولہ نتائج اور مستحکم رجحانات کے مطابق، بھارتیہ جنتا پارٹی (بی جے پی) نے مغربی بنگال اور آسام میں تاریخی کامیابی حاصل کی ہے، جبکہ جنوبی ہند کی ریاست کیرالہ میں کانگریس کی قیادت والے یو ڈی ایف (UDF) نے شاندار واپسی کرتے ہوئے ایل ڈی ایف کو اقتدار سے باہر کر دیا ہے۔ تمل ناڈو میں پہلی بار میدان میں اتری وجے کی پارٹی ‘ٹی وی کے ‘ نے روایتی جماعتوں کو سخت ٹکر دے کر سب کو حیران کر دیا ہے۔

مغربی بنگال میں ممتا کو مات
مغربی بنگال کے نتائج سب سے زیادہ حیران کن رہے۔ بی جے پی نے 293 نشستوں میں سے 190 سے زائد پر برتری حاصل کر کے ممتا بنرجی کے 15 سالہ اقتدار کا خاتمہ کر دیا ہے۔ ترنمول کانگریس (TMC) محض 90 نشستوں کے آس پاس سمٹ گئی ہے۔ یہ پہلی بار ہے کہ بی جے پی بنگال میں سادہ اکثریت حاصل کر کے اپنی حکومت بنانے جا رہی ہے۔
تمل ناڈو: وجے کا سیاسی دھماکہ
تمل ناڈو میں ‘تملگا ویٹری کذگم ‘ (TVK) نے ڈی ایم کے (DMK) اور اے آئی اے ڈی ایم کے کو پیچھے چھوڑتے ہوئے 100 سے زائد نشستوں پر سبقت حاصل کر لی ہے۔ تامل سپر اسٹار وجے کی اس نئی پارٹی نے ریاست کی دہائیوں پرانی دو فریقی سیاست کو سہ فریقی بنا دیا ہے۔ ڈی ایم کے اتحاد کو شدید نقصان اٹھانا پڑا ہے۔
کیرالہ اور آسام: اقتدار کی تبدیلی اور برقرار
کیرالہ: یہاں ہر پانچ سال بعد حکومت بدلنے کی روایت برقرار رہی۔ کانگریس کی قیادت میں یو ڈی ایف نے 85 سے زائد نشستوں پر سبقت لے کر بائیں بازو (LDF) کو شکست دے دی ہے۔
آسام: بی جے پی نے یہاں اپنا اقتدار برقرار رکھا ہے۔ ہیمنت بسوا سرما کی قیادت میں بی جے پی اتحاد 80 سے زائد نشستوں کے ساتھ دوبارہ حکومت بنانے کے لیے تیار ہے۔
پڈوچیری اور ضمنی انتخابات
پڈوچیری میں این آر کانگریس اور بی جے پی اتحاد نے اکثریت حاصل کر لی ہے۔ دوسری جانب مختلف ریاستوں میں ہونے والے 7 اسمبلی ضمنی انتخابات میں بی جے پی نے 4، کانگریس نے 2 اور این سی پی نے ایک نشست پر کامیابی حاصل کی ہے۔
سیاسی ماہرین ان نتائج کو 2029 کے عام انتخابات کا پیش خیمہ قرار دے رہے ہیں۔ جہاں شمال اور مشرق میں بی جے پی مزید مضبوط ہوئی ہے، وہی جنوبی ہند میں علاقائی جماعتوں اور کانگریس نے اپنی موجودگی کا احساس دلایا ہے۔