وزیر ڈاکٹر عرفان انصاری نے صحت کی خدمات کو مضبوط بنانے کیلئے بجٹ سے پہلے تجاویز طلب کیں
مثبت تبدیلی کے لیے اجتماعی کوشش ضروری: وزیر
جدید بھارت نیوز سروس
رانچی، 14جنوری: وزیر صحت ڈاکٹر عرفان انصاری نے ریاست کے صحت کے نظام کو مضبوط اور موثر بنانے کے مقصد سے آئندہ بجٹ اجلاس سے پہلے جھارکھنڈ کے تمام اراکین پارلیمنٹ، ایم ایل ایز اور وزراء سے تجاویز اور مشورے طلب کیے ہیں۔ڈاکٹر عرفان انصاری نے نئے سال کے پرمسرت موقع پر تمام عوامی نمائندوں کو مبارکباد دیتے ہوئے کہا کہ ریاست جھارکھنڈ کا آئندہ مالیاتی بجٹ اجلاس جلد شروع ہونے والاہے، جس میں محکمہ صحت کا بجٹ بھی اسمبلی کی میز پر پیش کیا جائے گا۔اس سلسلے میں انہوں نے تاکید کی کہ تمام عوامی نمائندے صحت کی خدمات کو بہتر بنانے کے لیے اپنی قیمتی تجاویز سے آگاہ کریں۔ تاکہ ان تجاویز کو زیادہ سے زیادہ بجٹ میں شامل کرکے ریاست کے نظام صحت کو مزید مضبوط کیا جاسکے۔ ڈاکٹر انصاری نے کہا کہ ڈاکٹر ہونے کے ناطے وہ صحت کے نظام کے چیلنجوں اور ضروریات کو بخوبی سمجھتے ہیں۔ان کا خیال ہے کہ صحت کے شعبے میں مثبت تبدیلی لانے کے لیے اجتماعی کوششیں ضروری ہیں۔ان کی قیادت میں صحت کی خدمات کو جدید ٹیکنالوجی اور انفراسٹرکچر سے آراستہ کرنے کے لیے ٹھوس اقدامات کیے جائیں گے۔وزیر ڈاکٹر عرفان انصاری کا یہ اقدام ظاہر کرتا ہے کہ وہ صحت کے نظام کے حوالے سے سنجیدہ اور حساس ہیں۔ ان کا یہ قدم جھارکھنڈ کی صحت خدمات میں جامع بہتری کی سمت میں سنگ میل ثابت ہوگا۔آنے والے وقت میں یہ کوششیں ریاست کے عوام کو صحت کی بہتر سہولیات فراہم کرنے میں فیصلہ کن ثابت ہوں گی۔
