National

’انتخابی تشہیر، تقریر اور عوام سے ملاقات کے دوران آئین کی کاپی اپنے ساتھ رکھیں‘، راہل گاندھی کی کانگریس امیدواروں سے اپیل

59views

کانگریس کے سابق صدر راہل گاندھی نے لوک سبھا انتخاب میں کھڑے پارٹی امیدواروں سے منگل کے روز ایک خصوصی گزارش کی۔ انھوں نے کانگریس امیدواروں سے گزارش کی ہے کہ پرچۂ نامزدگی داخل کرتے وقت، انتخابی اجلاس کے دوران اور عوام سے ملاقات کرتے وقت اپنے پاس آئین کی کاپی ضرور رکھیں۔ راہل گاندھی نے انھیں یہ بھی مشورہ دیا ہے کہ یہ آئین کی کاپی لوگوں کو دکھائیں اور بتائیں کہ جب تک ان کی پارٹی ہے، تب تک دنیا کی کوئی طاقت ہندوستان سے اس کا آئین نہیں چھین سکتی۔

دراصل راہل گاندھی نے اپنے سوشل میڈیا پلیٹ فارم ’ایکس‘ پر ایک پوسٹ کیا ہے جس میں کانگریس امیدواروں کے ساتھ ساتھ پارٹی لیڈران سے بھی گزارش کی گئی ہے کہ جب وہ انتخابی تشہیر پر نکلیں تو اپنے ساتھ ہندوستانی آئین کی کاپی ضرور رکھیں۔ اس پوسٹ میں لکھا گیا ہے کہ ’’غریبوں کے لیے وَردان (تحفہ)، محروموں کے لیے سمّان (احترام) اور ہر شہری کا ابھیمان (وقار)- ہمارا سمویدھان (آئین)!‘‘ پھر وہ لکھتے ہیں ’’کانگریس کے سبھی امیدواروں اور لیڈروں سے میری گزارش ہے کہ وہ پرچہ نامزدگی بھرنے، اجلاس، تقریروں اور عوامی رابطہ کے دوران پاکیزہ آئین کو اپنے ساتھ ضرور رکھیں۔ گاؤں گاؤں، گلی گلی یہ اعلان کر دو کہ جب تک کانگریس ہے، بی جے پی کیا دنیا کی کوئی طاقت ہندوستان سے اس کا آئین نہیں چھین سکتی۔‘‘

قابل ذکر ہے کہ راہل گاندھی لوک سبھا انتخاب کی تشہیر کے دوران اپنے ساتھ آئین کی کاپی لے کر چل رہے ہیں۔ انتخابی اجلاس کے دوران وہ لوگوں کو آئین کی یہ کاپی دکھاتے ہیں اور بتاتے ہیں کہ بی جے پی حکومت آئی تو اس کو تباہ کر دے گی، اس لیے عوام انڈیا اتحاد کے امیدواروں کو کامیاب بنائیں۔ راہل گاندھی اور کانگریس کے دیگر سرکردہ لیڈران لگاتار یہ الزام لگا رہے ہیں کہ بی جے پی اور وزیر اعظم نریندر مودی آئین کو بدلنا چاہتے ہیں اور ریزرویشن کو ختم کرنا چاہتے ہیں۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.