جے پور: راشٹریہ راجپوت کرنی سینا کے قومی صدر سکھدیو سنگھ گوگامیڈی کو جے پور میں گولی مار کر ہلاک کر دیا گیا۔ ابتدائی معلومات کے مطابق یہ واقعہ شیام نگر علاقہ میں واقع ان کے گھر پر پیش آیا۔ گولی لگنے کے فورا بعد گوگامیڈی کو میٹرو ماس ہسپتال لایا گیا جہاں وہ زخموں کی تاب نہ لاسکے اور ڈاکٹرز نے انھیں مردہ قرار دے دیا۔عینی شاہدین نے بتایا کہ گوگامیڈی منگل کی دوپہر شیام نگر علاقے میں اپنے گھر کے باہر کھڑے تھے کہ اسی دوران اسکوٹی پر سوار دو حملہ آوروں نے اس پر گولی چلا کر فرار ہوگئے۔ معاملے کی اطلاع ملتے ہی شیام نگر پولیس اسٹیشن کے اہلکار موقع پر پہنچ گئے۔ پولیس نے حملہ آوروں کی گرفتاری کے لیے خصوصی ٹیم تشکیل دے دی۔اس واقعہ کے بعد سماج کے لوگوں میں کافی غصہ پایا جا رہا ہے۔ گوگامیڈی کے قتل کی خبر علاقے میں جنگل کی آگ کی طرح پھیلی، جس کی وجہ سے گوگامیڈی کے حامی اب ان کے گھر پہنچ رہے ہیں۔ قابل ذکر ہے دو روز قبل ہی راجستھان میں اسمبلی انتخاب کے نتائج سامنے آئے ہیں اور ابھی وہاں بی جے پی کی نئی حکومت نے حلف بھی نہیں اٹھایا ہے کہ اس سے پہلے ہی یہ واقعہ پیش آگیا۔
