ٹریژری گھوٹالے کی تحقیقات تیز

سی آئی ڈی کی خصوصی ٹیم بوکارو ایس پی آفس پہونچی

جدید بھارت نیوز سروس
بوکارو، 25 اپریل:۔ بوکارو اور ہزاری باغ میں ٹریژری سے فرضی نکاسی کے ذریعے ہونے والے کروڑوں روپے کے گھپلے کی تحقیقات اب تیز ہو گئی ہیں۔ سی آئی ڈی کی پانچ رکنی خصوصی ٹیم بوکارو پہنچ چکی ہے اور ایس پی دفتر کے اکاؤنٹ سیکشن میں موجود ریکارڈز کی باریک بینی سے جانچ کر رہی ہے۔ ٹیم بالخصوص فرضی نکاسی سے متعلق دستاویزات اور بینکنگ ریکارڈز کو کھنگال رہی ہے۔ ذرائع کے مطابق اس گھپلے میں 50 کروڑ روپے سے زائد کی رقم غیر قانونی طور پر نکالے جانے کا خدشہ ظاہر کیا جا رہا ہے۔ معاملے کی سنگینی کے پیش نظر آئی جی پنکج کمبوج کی قیادت میں پہلے ہی ایک ایس آئی ٹی (SIT) تشکیل دی جا چکی ہے۔ سی آئی ڈی کی ٹیم ریکارڈ کی جانچ کے ساتھ ساتھ متعلقہ عملے سے بھی پوچھ گچھ کر رہی ہے۔ امکان ظاہر کیا جا رہا ہے کہ تحقیقات مکمل ہونے کے بعد اس بڑے مالیاتی اسکینڈل میں ملوث کئی اہم افراد کے خلاف سخت قانونی کارروائی عمل میں لائی جائے گی۔