رانچی میونسپل کارپوریشن نے دارالحکومت میں سڑکوں کی مرمت کیلئے ٹینڈر جاری کیا

جدید بھارت نیوز سروس
رانچی، 15 جنوری:۔ راجدھانی کی خستہ حال سڑکوں کو جلد ہی بہتر کیا جائے گا۔ رانچی میونسپل کارپوریشن نے شہر کے مختلف وارڈوں میں خراب سڑکوں اور نالوں کی حالت کو بہتر بنانے کا منصوبہ تیار کیا ہے۔ میونسپل کارپوریشن نے اس کے لیے 4.05 کروڑ روپے کا ٹینڈر جاری کیا ہے۔ اس کے تحت 44 سڑکوں اور نالوں کی تعمیر و مرمت کا کام کیا جائے گا۔ اس ٹینڈر میں 24 وارڈز کے مختلف علاقوں کی سڑکوں کو بہتر کیا جائے گا جس سے شہر کے باسیوں کو جلد ریلیف مل سکے گا۔ میونسپل کارپوریشن کی انجینئرنگ برانچ نے اس ٹینڈر کی معلومات سرکاری ویب سائٹ پر شائع کی ہے۔ ٹینڈر داخل کرنے کی آخری تاریخ 27 جنوری ہے۔ ٹینڈر 28 جنوری کو کھولے جائیں گے۔ کارپوریشن کی جانب سے یہ اقدام شہر کی خراب سڑکوں کو ٹھیک کرنے کے مقصد سے کیا گیا ہے، جو حادثات کا سبب بن رہے تھے۔ شہر کے کئی علاقوں میں سڑکوں کی حالت انتہائی خراب ہے۔ وہاں سے گزرنا بھی مشکل ہے۔ سڑک کے کئی مقامات پر ٹوٹ پھوٹ کے باعث حادثات ہو رہے ہیں۔ اس کے ساتھ ہی نل جل یوجنا کے تحت کھودی گئی سڑکوں کی جلد مرمت نہیں کی گئی جس کی وجہ سے پریشانی میں مزید اضافہ ہوگیا ہے۔