بے قابو ٹرک بجلی کے کھمبے سے ٹکرا گیا

رانچی: منگل کی صبح باریاتو تھانہ علاقے کے ہل ویو موڑ پر ایک بے قابو ٹرک لوہے کے بجلی کے کھمبے سے ٹکرا گیا۔ تصادم اتنا زوردار تھا کہ لوہے کا کھمبہ درمیان سے ٹوٹ کر دو ٹکڑے ہو گیا۔ بجلی کے تار بھی سڑک پر گر گئے۔ ٹرک کا اگلا حصہ مکمل طور پر تباہ ہوگیا۔ اس تصادم میں ڈرائیور اور ہیلپر دونوں زخمی ہو گئے ہیں۔ زوردار شور سن کر مقامی لوگ اور باریاتو پولیس کی ٹیم موقع پر پہنچ گئی۔ باریاتو پولیس نے عقلمندی کا مظاہرہ کرتے ہوئے پہلے دونوں طرف سے ٹریفک کو روکا اور فوری طور پر محکمہ بجلی کو فون کرکے لائن منقطع کروائی۔ اگر بروقت بجلی منقطع نہ کی جاتی تو بڑا حادثہ رونما ہوسکتا تھا۔ جس وقت یہ حادثہ پیش آیا اس وقت زیادہ تر اسکول بسیں سڑک پر سے گزر رہی تھیں۔ حادثے کی وجہ سے باریاتو روڈ آدھے گھنٹے سے زائد بلاک رہی۔ کئی اسکول بسیں جام میں پھنسی رہیں۔ سڑک سے بجلی کی تاریں ہٹانے کے بعد ٹریفک معمول بن گئی۔