’جھارکھنڈ سماویشی آجیویکا یوجنا ‘ کا آغاز، وزیر دپیکا پانڈے سنگھ نے کیا افتتاح

ریاست میں انتہائی غریب اور محروم خاندانوں کی کفالت کیلئے ملک کا پہلا کامیاب ماڈل تیار ؛ ملک بھر میں ہو رہی ہے ستائش

جدید بھارت نیوز سروس
رانچی، 22 مئی: محکمہ دیہی ترقی کے زیر اہتمام جھارکھنڈ اسٹیٹ لائیولی ہڈ پروموشن سوسائٹی (JSLPS) اور دی نج انسٹی ٹیوٹ کے اشتراک سے رانچی کے پروجیکٹ بھون آڈیٹوریم میں ‘جھارکھنڈ سماویشی آجیویکا یوجنا ‘ (JH-SAY) کا باضابطہ آغاز کیا گیا۔ اس باوقار تقریب کے دوران ریاست میں ‘الٹرا پوور گریجویشن اپروچ ‘ (UPAJ) کے تجربات، نمایاں کامیابیوں اور اس کے مثبت سماجی اثرات کو تفصیلی طور پر پیش کیا گیا۔ تقریب میں کئی اضلاع سے آئے ہوئے نمائندوں اور اعلیٰ حکام نے شرکت کی۔
جھارکھنڈ کا ماڈل پورے ملک کے لیے مشعل راہ
تقریب سے خطاب کرتے ہوئے دیہی ترقی کی وزیر دیپیکا پانڈے سنگھ نے کہا کہ یہ جھارکھنڈ کے لیے ایک تاریخی اور انتہائی اہم دن ہے۔ ریاست ایک کامیاب ماڈل کے تجربات کو شیراک کرنے کے ساتھ ساتھ انتہائی غریب اور محروم خاندانوں کو بااختیار بنانے کے لیے اس نئی جامع اسکیم کا آغاز کر رہی ہے۔ انہوں نے فخر کا اظہار کرتے ہوئے کہا کہ جھارکھنڈ نے جامع ترقی کے شعبے میں ایک ایسا بہترین ماڈل تیار کیا ہے، جسے اب پورے ملک میں اپنایا جا رہا ہے اور دیگر ریاستیں بھی اس سے سیکھ رہی ہیں۔
ملک کا پہلا پائلٹ پروجیکٹ
وزیر موصوف نے مزید بتایا کہ UPAJ پروجیکٹ، دین دیال انتودیا یوجنا-قومی دیہی معاش مشن (DAY-NRLM) کے تحت گریجویشن اپروچ کا ملک کا پہلا پائلٹ پروجیکٹ تھا۔ اسے خاص طور پر انتہائی غریب اور خصوصی طور پر کمزور قبائلی گروپوں (PVTG) کے خاندانوں کو معاشی اور سماجی طور پر مضبوط بنانے کے مقصد سے شروع کیا گیا تھا۔ اس اسکیم نے زمینی سطح پر غریبوں کی زندگی بدلنے میں اہم کردار ادا کیا ہے اور ان کے معیار زندگی کو بلند کیا ہے۔
قومی سطح پر اسکیم کو ملی منظوری
وزیر نے تفصیلات بتاتے ہوئے کہا کہ اس پروجیکٹ کے ذریعے مشرقی سنگھ بھوم، گوڈا اور پلامو اضلاع کے چار بلاکس میں خواتین کی کمیونٹی تنظیموں کے تعاون سے 4 ہزار انتہائی غریب خاندانوں تک رسائی حاصل کی گئی۔ جھارکھنڈ میں اس اسکیم کے شاندار اور مثبت نتائج کو دیکھتے ہوئے حکومت ہند نے اسے قومی سطح پر نافذ کرنے کا فیصلہ کیا اور سال 2025 میں اسے DAY-NRLM کے تحت ایک ذیلی اسکیم کے طور پر پورے ملک میں نافذ کر دیا گیا۔
ہزاروں خاندانوں کو جوڑنے کا ہدف
دیپیکا پانڈے سنگھ نے آئندہ کے منصوبوں کا ذکر کرتے ہوئے کہا کہ اس اسکیم کے پہلے اور دوسرے مرحلے میں جھارکھنڈ کو کل 41 ہزار انتہائی غریب خاندانوں کو اس مہم سے جوڑنے کی ذمہ داری ملی ہے۔ اگلے مرحلے میں ریاست کے 6 اضلاع کے 16 ہزار خاندانوں اور اس کے بعد مزید 25 ہزار خاندانوں کو اس اسکیم کے تحت لایا جائے گا۔ انہوں نے کہا کہ وزیر اعلیٰ ہیمنت سورین کی قیادت میں ریاستی حکومت یہ یقینی بنا رہی ہے کہ ترقی کے ثمرات سماج کے آخری فرد تک پہنچیں۔
محروم طبقے کی زندگی میں آئی تبدیلی
اپنے خطاب کے آخر میں انہوں نے کہا کہ جو خاندان پہلے بھوک، بدحالی اور عدم تحفظ کی زندگی گزارنے پر مجبور تھے، آج حکومتی اسکیموں کی وجہ سے ان کی زندگیوں میں مستقل اور واضح تبدیلی نظر آ رہی ہے۔ تقریب کے دوران ڈولی پہاڑیا نامی خاتون کی ایک متاثر کن کہانی بھی شیئر کی گئی، جس نے اس اسکیم سے جڑنے کے بعد اپنے خاندان کی تقدیر بدل دی۔ آج ان کے بچے انگریزی میڈیم اسکول میں زیر تعلیم ہیں اور ان کا خاندان خود روزگار کے ذریعے پوری طرح خود کفیل ہو چکا ہے۔