برسا ایگریکلچر یونیورسٹی میں دو روزہ ریاستی زرعی ورکشاپ کا کامیاب اختتام

ایل نینو کے خطرات کے پیش نظر خشک سالی سے نمٹنے کی تیاری

کسانوں کے مفادات پر کوئی سمجھوتہ نہیں ہوگا: شلپی نیہا ترکی

جدید بھارت نیوز سروس
رانچی ، 12؍ مئی: ریاست کے زرعی نظام کو مزید بااختیار، منظم اور کسان دوست بنانے کے مقصد سے برسا ایگریکلچر یونیورسٹی کے آڈیٹوریم میں منعقدہ دو روزہ ریاستی سطح کی زرعی ورکشاپ کا کامیاب اختتام ہوا۔ اس موقع پر زراعت، حیوانات اور تعاون کی وزیر شلپی نیہا ترکی نے کہا کہ ریاستی حکومت کسانوں کے مفادات پر کسی بھی صورت میں سمجھوتہ نہیں کرے گی۔وزیر موصوفہ نے کہا کہ محکمہ موسمیات نے اس سال ‘ایل نینو ‘ (El-Nino) کے اثرات کی وجہ سے معمول سے کم بارش کا امکان ظاہر کیا ہے۔ اسے مدنظر رکھتے ہوئے تمام اضلاع کو ہنگامی خشک سالی کے منصوبے (Contingency Plan) تیار کرنے کی ہدایت دی گئی ہے۔ ورکشاپ کے دوران اضلاع کی جانب سے پیش کردہ ڈرافٹ پلانز پر تفصیلی تبادلہ خیال کر کے ریاستی سطح کا مربوط منصوبہ تیار کیا گیا۔انہوں نے کہا کہ کسانوں کا تحفظ، بروقت معیاری بیج، آبپاشی کی سہولت، زرعی قرض، کھاد اور ادویات کی دستیابی کو یقینی بنانا حکومت کی اولین ترجیح ہے۔ پنچایت کی سطح تک کسانوں کی شرکت بڑھانے، منصوبوں پر بروقت عمل درآمد اور ایف پی او (FPO) اور سیلف ہیلپ گروپس (SHG) کو اسکیموں سے جوڑنے پر خاص زور دیا گیا۔وزیر نے کہا کہ اس سال شہد کی مکھیوں کی پالن، لاکھ کی پیداوار، باغبانی اور زراعت پر مبنی خود روزگار اسکیموں کو ترجیح دی جائے گی۔ تمام متعلقہ محکموں کو مقررہ وقت کے اندر کام مکمل کرنے کی ہدایت دی گئی ہے۔انہوں نے کہا کہ کسانوں کے مسائل کا فوری حل ہی حکومت کی اصل کامیابی کا معیار ہے اور ریاستی حکومت زراعت کو منافع بخش، پائیدار اور خود کفیل بنانے کے لیے مکمل طور پر پرعزم ہے۔ لاکھ کی پیداوار اور شہد کی مکھیوں کی پالن کو فروغ دینے کے لیے اگلے دو ماہ کے اندر کلسٹرز کی نشاندہی کر کے فائدہ اٹھانے والوں کا انتخاب کیا جائے گا اور انہیں ضروری کٹس فراہم کی جائیں گی۔ریاستی حکومت کسانوں کی آمدنی میں اضافے، زرعی پیداوار میں بڑھوتری اور دیہی معیشت کو مستحکم کرنے کے لیے پرعزم ہے۔ تمام محکموں کو جوابدہی اور نتائج پر مبنی طرزِ عمل اپناتے ہوئے مقررہ وقت میں منصوبوں پر عمل درآمد کی ہدایت دی گئی ہے۔