جھارکھنڈ میں کھولے جائیں گے 700 ’ابوا میڈیکل ‘اسٹور

غریبوں کو ملے گی مفت دوا: وزیر عرفان انصاری

جدید بھارت نیوز سروس
رانچی، 16 ستمبر:۔ جھارکھنڈ کے لوگوں کے لیے ایک بڑی خوشخبری ہے۔ ریاستی حکومت ریاست بھر میں ابوا میڈیکل اسٹور کھولنے جا رہی ہے۔ پہلے مرحلے میں کل 700 ابوا میڈیکل اسٹور کھولے جائیں گے۔ اس اسٹور کے ذریعے ریاست کے دور دراز دیہی علاقوں میں ادویات پہنچانے کا انتظام کیا جا رہا ہے۔ ان دکانوں سے غریبوں کو ادویات مفت دستیاب ہوں گی۔ کل، پیر کو وزیر صحت ڈاکٹر عرفان انصاری نے وزیر اعلیٰ ہیمنت سورین سے کانکے روڈ پر واقع رہائشی دفتر میں ملاقات کی۔ وزیراعلیٰ نے ہدایت کی کہ کوئی غریب ادویات کی کمی سے نہ مرے، محکمہ صحت کو ادویات کی دستیابی کو یقینی بنانا ہوگا۔ وزیر صحت نے کہا کہ وزیر اعلیٰ محکمہ صحت کے حوالے سے بہت حساس ہیں۔ ان کی ہدایات پر پہلے مرحلے میں 700 ابوا میڈیکل اسٹور کھولے جائیں گے۔ ریاست کے دور دراز دیہی علاقوں تک ادویات پہنچانے کے انتظامات کئے جا رہے ہیں۔