ہائیوا آتش زنی کیس کا 24 گھنٹے میں انکشاف؛ راہل دوبے گینگ کے 4 ارکان گرفتار

جدید بھارت نیوز سروس
ہزاریباغ،24؍اپریل: پولیس نے محض 24 گھنٹے کے اندر بڑکا گاؤں 13 مائل پل کے پاس ہائیوا (ٹرک) میں آتش زنی کے واقعے کا انکشاف کرتے ہوئے چار ملزمان کو گرفتار کر لیا ہے۔ ان کے قبضے سے اسلحہ بھی برآمد ہوا ہے۔ ان تمام ملزمان کا تعلق راہول دوبے گینگ سے ہے۔
24 گھنٹے کے اندر انکشاف
ہزاری باغ ضلع کے بڑکا گاؤں تھانہ علاقہ کے تحت 13 مائل پل کے پاس ہائیوا میں آتش زنی کے معاملے کا پولیس نے 24 گھنٹے کے اندر پردہ فاش کر دیا ہے۔ ہزاری باغ ایس پی نے پریس کانفرنس میں بتایا کہ گزشتہ دنوں راہول دوبے گروہ کی جانب سے پٹرول چھڑک کر گاڑی کو آگ لگائی گئی تھی، جس کی ذمہ داری ہاتھ سے لکھے ہوئے پرچے چھوڑ کر قبول کی گئی تھی۔ اس پرچے پر پرکاش شکلا، مینک سنگھ اور راہول دوبے گینگ لکھا ہوا تھا۔
چھاپہ ماری میں چار گرفتار
معاملے کی سنگینی کو دیکھتے ہوئے ایس آئی ٹی (SIT) تشکیل دی گئی۔ خفیہ اطلاع کی بنیاد پر چندول گاؤں میں واقع ہتھیا پتھر جنگل میں چھاپہ ماری کر کے چار ملزمان کو گرفتار کیا گیا۔ گرفتار ملزمان میں محمد اعجاز، محمد آفتاب، محمد سلامت انصاری اور تشار سنہا شامل ہیں۔
ملزمان کا مجرمانہ ریکارڈ
تلاشی کے دوران ان کے قبضے سے تین پستول، 11 زندہ کارتوس، پرچے اور موبائل برآمد کیے گئے۔ پوچھ گچھ میں ملزمان نے واقعے میں ملوث ہونے کا اعتراف کرتے ہوئے کول مائننگ (کوئلے کی کان کنی) کے علاقے میں دہشت پھیلانے کی سازش کا انکشاف کیا۔ محمد سلامت انصاری، جو بڑکا گاؤں کا ہی رہنے والا ہے، اس کے خلاف بڑکا گاؤں تھانہ میں تین اور ٹنڈوا میں ایک معاملہ درج ہے۔ جبکہ محمد اعجاز کے خلاف بڑکا گاؤں میں ایک کیس درج ہے۔