دنتے واڑہ: چھتیس گڑھ کے دنتے واڑہ ضلع میں نکسلیوں نے ایک بڑی واردات کو انجام دیا ہے۔ نکسلیوں نے ڈیڑھ درجن گاڑیوں کو آگ لگا دی ہے۔ تمام گاڑیاں ایک نجی تعمیراتی کمپنی کی ہیں۔ نکسلیوں نے اتوار اور پیر کی درمیانی رات بیلاڈیلا روڈ پر آگ زنی کی یہ واردات انجام دی۔ اس آگ زنی سے کافی نقصان ہوا ہے۔دنتے واڑہ سے بیلاڈیلا کے بیچ کی سڑک کو کشادہ کرنے کا کام کیا جا رہا ہے اور یہ کام آر سی کینال کمپنی کر رہی ہے۔ کمپنی نے اپنا کیمپ بنگالی کیمپ کے قریب بنایا ہے جو کہ بھانسی پولیس اسٹیشن سے 1 کلومیٹر دور ہے۔ کل رات تقریباً 2 بجے 150 سے زیادہ نکسلی وہاں پہنچے اور سڑک کی تعمیر میں زیر استعمال گاڑیوں کو آگ لگا دی۔ بتایا جا رہا ہے کہ سینکڑوں نکسلیوں میں وردی والے مسلح نکسلی بھی شامل تھے۔
دنتے واڑہ کے ایس پی گورو رائے نے اس واقعہ کی تصدیق کی۔ انہوں نے بتایا کہ نکسلیوں نے گاڑیوں کو نذر آتش کرنے کر دیا اور موقعے سے فرار ہوگئے۔ اس دوران نکسلیوں نے موقعے پر موجود چوکیداروں کو تعمیراتی کام روکنے کی دھمکی دی اور کہا کہ مستقبل میں بھی ایسے واقعات رونما ہوں گے۔ موقعے سے کچھ بینر پوسٹر بھی برآمد ہوئے ہیں۔ فی الحال اطلاع ملنے کے بعد موقعے پر فورس بھیج دی گئی ہے۔ گاؤں والوں سے بھی پوچھ گچھ کی جا رہی ہے۔عینی شاہد بدھرام مارکم نے بتایا کہ رات ایک سے دو بجے کے درمیان 50 سے 60 مسلح نکسلی ڈامر پلانٹ پر پہنچے اور وہاں موجود لوگوں سے بندوق کی نوک پر موبائل فون چھین لیے۔ اس کے بعد مزدوروں کو ڈامر پلانٹ کے کنارے کھڑا کر دیا۔ اس کے بعد گاڑیوں سے ڈیزل نکال کر ڈامر پلانٹ سمیت تمام گاڑیوں کو آگ لگا دی۔ بعد ازاں تمام نکسلائیٹ فرار ہوگئے۔
بھانسی ڈامر پلانٹ کو آگ لگانے کے ساتھ ہی نکسلیوں نے 4 ٹرک، 2 پانی کے ٹینک، 1 مکسر مشین، 1 ایجیکس، 1 پک اپ، 3 ہائیڈرا اور ایک ڈیزل گاڑی کو تباہ کر دیا۔ نکسلیوں نے ریلوے لائن کو ڈبل کرنے کے کام میں مصروف پوکلین گاڑی کو بھی نہیں بخشا۔ یہ ڈامر پلانٹ بھانسی تھانے کے علاقے سے صرف 2 کلومیٹر کے فاصلے پر واقع ہے۔ آتشزدگی کے واقعے کے بعد سکیورٹی فورسز کو موقعے پر روانہ کر دیا گیا ہے جہاں فوجی علاقے کی تلاشی لے رہے ہیں۔
