مدھو پور،۲۸؍اکتوبر: مدھوپور این ڈی اے کے امیدوار گنگا نارائن سنگھ نے سوموار کو سب ڈویژن آفس میں اپنا پرچہ نامزدگی داخل کیا۔ ریلوے فٹبال گراؤنڈ میں بی جے پی لیڈر گنگا نارائن سنگھ کی انتخابی نامزدگی میٹنگ سے خطاب کرتے ہوئے بی جے پی لیڈر سابق وزیر اعلی چمپائی سورین نے کہا کہ جھارکھنڈ مکتی مورچہ، کانگریس اور راجدنے کبھی جھارکھنڈ کے لیے اچھا نہیں سوچا۔ کانگریس نے خود جھارکھنڈ تحریک کو کچلنے کا کام کیا اور جھارکھنڈ کے لوگوں کو کبھی انصاف نہیں دیا۔ قبائلیوں، دلتوں اور پسماندہ طبقات کے ساتھ ہمیشہ ناانصافی کی گئی۔ سنتھال پرگنہ میں قبائلی باشندوں کی تعداد کم ہو رہی ہے، قبائلی زمینوں پر قبضہ کیا جا رہا ہے، اورجے ایم ایم کی قیادت والی حکومت کچھ کہنے کو تیار نہیں ہے۔ ماں بہن بیٹی کی عزت خطرے میں ہے۔ اس بارجھارکھنڈ میں تبدیلی کی لہر ہے۔جھارکھنڈ میں بی جے پی اتحاد کی جیت یقینی ہے۔ علاقے میں قبائلی افراد کو قتل کیا جا رہا ہے،راجیش مرمو کا قتل کیا گیا تھا۔ بے سہارا خاندان کا کوئی سہارا نہیں۔نوکریوں کی دوڑ کے نام پر 18 نوجوانوں کی موت ہوئی، حکومت قوانین میں نرمی کر سکتی تھی۔ اگر جھارکھنڈ کو بچانا ہے تو ریاست میں این ڈی اے کی مخلوط حکومت بنانی ہوگی۔ وزیر اعظم نریندر مودی کی قیادت میں ملک ترقی کر سکتا ہے، یہ کسی اور کی قیادت میں نہیں ہو گا۔ جھارکھنڈ میں ان کے 5 مہینوں کے دور میں مئیاسمان یوجنا سمیت کئی اہم اسکیمیں نافذ کی گئیں۔ میری برطرفی کے بعد بہت سی فلاحی اسکیمیں بند کردی گئیں۔ جھارکھنڈ کو بچانا ہوگا، سنتھال پرگنہ میں دراندازیوں کو روکنا ہوگا۔مدھوپور اسمبلی سے گنگا نارائن سنگھ کی جیت کو یقینی بنانا ہے۔ گڈا کے ایم پی ڈاکٹر نشی کانت دوبے نے کہا کہ درگا پوجا وسرجن کے دوران چاند ماری میں پردیپ مودی کے ساتھ پیش آنے والا واقعہ، سکٹیا میں قبائلی نوجوان راجیش مرمو کا وحشیانہ قتل مدھو پور کے لوگوں کو خبردار کر رہا ہے۔ گنگا جمنی کلچر، مدھوپوریت صرف نام پر رائج ہے،مدھوپور خطرے میں ہے۔ اگر مدھو پور کے لوگ نہیں جاگے تو آنے والے دنوں میں انہیں یہاں سے بھاگناپڑے گا۔ ہر کسی کو ذات پات سے اوپر اٹھ کر گنگا نارائن سنگھ کو مدھو پور سے بھاری ووٹوں سے جتاناچاہیے۔ مجھے گزشتہ لوک سبھا انتخابات میں مدھوپور سے اپنی شکست پر افسوس ہے۔ اس کی وجہ بھی جے چند اور وبھیشن جیسے لوگ ہیں۔ اب عوام جاگ چکی ہے۔ جے چند اور وبھوشن میں ہمت ہے تو مدھو پور سے آزاد الیکشن لڑ کر دکھائیں۔ گڈا کے ایم پی ڈاکٹر نشی کانت دوبے نے کہا کہ بی جے پی امیدوار گنگا نارائن سنگھ کو مدھو پور سے 50 ہزار سے زیادہ ووٹوں سے جیتناچاہئے، ہم مل کر ترقی کریں گے۔فٹبال کے میدان میں ایک بار پھر فتح کا جشن منایا جائے گا۔ بی جے پی امیدوار گنگا نارائن سنگھ نے کہا کہ وہ ذات پات سے اوپر اٹھیں اور مدھو پور کی ترقی، عزت اور ناموس کی حفاظت کے لیے انہیں بھاری ووٹوں سے کامیاب بنائیں۔ مقامی ایم ایل اے اور وزیر حفیظ الحسن پر بدعنوانی اور اقربا پروری کو فروغ دینے کا الزام ہے۔ مدھو پور میں قبائلیوں پر مظالم اور زمین کی لوٹ مار کی طرف اشارہ کرتے ہوئے انہوں نے کہا کہ عوام کو ووٹنگ کے ذریعے اس کا جواب دینا چاہئے۔ پروگرام کی نظامت بی جے پی لیڈر ہیمنت نارائن سنگھ نے کی۔ اس موقع پر پارٹی کے ضلع صدر سچن روانی، وشاکھا سنگھ، مالتی دیوی، پپو یادو سمیت ہزاروں لوگ موجود تھے۔
