بریلی میں بی جے پی کارکنوں میں پارٹی امیدوار کے خلاف ناراضگی، ریاستی صدر کے سامنے نعرے بازی، اکھلیش یادو نے کیا طنز
![](https://jadeedbharat.com/wp-content/uploads/2024/04/bjp_bareilly-FLe9UJ-750x450.jpeg)
بریلی: یو پی کے بریلی میں بی جے پی کارکنان اپنی ہی پارٹی کے امیدوار چھترپال گنگوار کے خلاف سراپا احتجاج بن گئے ہیں۔ نیوز پورٹل ’آج تک‘ کی رپورٹ کے مطابق نوبت یہاں تک آ گئی ہے کہ یوپی بی جے پی کے صدر بھوپیندر چودھری جب بریلی پہنچے تو کارکنوں نے انہیں گھیر لیا۔ دریں اثنا، پارٹی کے میئر کے خلاف بھی نعرے لگائے اور سڑک بلاک کر دی گئی۔
دراصل، بھارتیہ جنتا پارٹی نے اس بار سنتوش گنگوار کو ٹکٹ نہیں دیا ہے جو بریلی سے 8 بار رکن اسمبلی رہ چکے ہیں۔ ان کی جگہ چھترپال گنگوار کو میدان میں اتارا گیا ہے۔ تاہم اس کو لے کر بی جے پی کارکنوں میں ناراضگی ہے۔ اسی دوران بریلی کے میئر امیش گوتم کا ایک آڈیو وائرل ہو رہا ہے، جس میں وہ سنتوش گنگوار پر نازیبا تبصرہ کر رہے ہیں۔ اس کو لے کر بی جے پی کارکنوں میں کافی غصہ ہے۔
حال ہی میں بریلی میں ایک جلسہ میں وزیر اعلیٰ یوگی آدتیہ ناتھ کے خطاب سے پہلے میئر امیش گوتم اور سابق مرکزی وزیر سنتوش گنگوار کے درمیان جھگڑا ہوا تھا۔ دریں اثنا، میئر کی آڈیو نے آگ پر ایندھن ڈال دیا ہے۔ اس کے بعد سنتوش گنگوار کے حامی ان کی رہائش گاہ پہنچے اور حمایت میں نعرے لگائے۔ بی جے پی کارکنوں کا کہنا ہے کہ امیش گوتم میئر ہیں، انہیں ایسی باتیں نہیں کرنی چاہئیں۔
بی جے پی کارکن نے کہا کہ میرے پاس ایک آڈیو آئی ہے، جس میں میئر نے کہا ہے کہ ہم پرشورام کی اولاد ہیں۔ ہمارے ایک برہمن نے چھتریوں کو 100 بار تباہ کیا ہے۔ ایک برہمن تمام ذاتوں پر غلبہ رکھتا ہے۔ ایک ہزار لوگوں کے لیے کافی ہے۔ اس نے ایسے سخت الفاظ کہے ہیں اور کہا ہے کہ ایک بہت بڑی شخصیت ہے جسے ہم نے ختم کر دیا ہے اور آئندہ بھی گھر میں گھس کر پٹخ پٹخ کر ماریں گے!
سنتوش گنگوار کی حمایت کرنے والے کارکنوں نے میئر امیش گوتم کے استعفیٰ کا مطالبہ کرنا شروع کر دیا۔ کارکنوں نے زوردار نعرے بازی کی اور امیش گوتم مردہ باد کے نعرے لگائے۔ کارکنوں کا کہنا ہے کہ اس کے بعد انہیں استعفیٰ دے دینا چاہئے اور بی جے پی کو بھی اومیش گوتم کو عہدے سے ہٹا دینا چاہئے۔ تاہم میئر نے اس پورے معاملے میں کوئی بیان نہیں دیا ہے۔
وہیں میئر امیش گوتم نے میڈیا سے بات کرنے سے انکار کر دیا ہے۔ ان کا کہنا ہے کہ انہوں نے احتجاج میں ایسا کوئی بیان نہیں دیا۔ صرف برہمن عزت نفس اور بھگوان پرشورام کے کئی مرتبہ زمین کو چھتریوں سے پاک کرنے کی بات کہی تھی۔
بریلی میں دیر رات کے اس ہنگامے کے بعد اکھلیش یادو نے بھی بی جے پی پر حملہ کیا ہے۔ انہوں نے کہا کہ نہ صرف یوپی بی جے پی میں بلکہ پورے ملک میں بے اطمینانی عروج پر ہے۔ ایک حالیہ معاملے میں ریاستی صدر کو بریلی شہر میں بی جے پی ایم پی کے دفتر میں بی جے پی کارکنوں نے گھیر لیا کیونکہ ان کے اپنے بی جے پی میئر نے کرمی برادری کے تئیں انتہائی قابل اعتراض اور نازیبا الفاظ کہے تھے۔ اسی طرح کی وجوہات کی بناء پر ملک بھر میں چھتری-ٹھاکر-راجپوت برادری بی جے پی کو شکست دینے کے لیے پرعزم ہیں۔ بی جے پی گجرات، راجستھان، ہریانہ، مغربی اور مشرقی اتر پردیش میں ہر جگہ ہار رہی ہے۔ عوام بی جے پی کا تکبر توڑ دیں گے۔
![Follow us on Google News](https://jadeedbharat.com/wp-content/uploads/2024/01/GoogleNews.png)