اروند شرما نے کونسل ضمنی انتخاب کے لیے پرچہ نامزدگی داخل کیا

وزیر اعلی سمراٹ چودھری ، نائب وزیر اعلیٰ اور حلیف جماعتوں کے قائدین کی شرکت

جدید بھارت نیوز سروس
پٹنہ، 30 اپریل: بہار بی جے پی کے ہیڈ کوارٹر انچارج سوریا کمار شرما (اروند شرما) نے آج بہار قانون ساز کونسل کے ضمنی انتخاب 2026 کے لیے اپنے کاغذاتِ نامزدگی داخل کر دیے۔ اس اہم موقع پر وزیر اعلیٰ سمراٹ چودھری، بی جے پی کے صوبائی صدر سنجے سراوگی، نائب وزیر اعلیٰ بیجیندر پرساد یادو، وجے کمار چودھری، سابق وزراء منگل پانڈے اور رام کرپال یادو، سنتوش کمار سمن، جے ڈی یو کے قومی کارگزار صدر سنجے کمار جھا، جے ڈی یو کے صوبائی صدر امیش سنگھ کشواہا، ایل جے پی (آر) کے صوبائی صدر راجو تیواری اور آر ایل ایم کے صوبائی صدر آلوک کمار سنگھ سمیت این ڈی اے کے تمام سینئر رہنما اور اراکین اسمبلی موجود تھے۔
نامزدگی سے قبل اروند شرما نے پارٹی کے صوبائی دفتر میں پنڈت دین دیال اپادھیائے اور کیلاش پتی مشرا کے مجسموں پر پھول چڑھائے اور انہیں خراجِ عقیدت پیش کیا۔ضمنی انتخاب میں این ڈی اے امیدوار بنائے جانے پر انہوں نے وزیر اعظم نریندر مودی، وزیر داخلہ امت شاہ، قومی صدر نتن نبین، وزیر اعلیٰ سمراٹ چودھری، جے ڈی یو کے قومی صدر نتیش کمار اور بی جے پی کے صوبائی صدر سنجے سراوگی سمیت تمام اتحادی جماعتوں کی قیادت کا شکریہ ادا کرتے ہوئے کہا کہ وہ قیادت کے بھروسے پر پورا اترنے کی بھرپور کوشش کریں گے۔
اروند شرما نے بی جے پی کے بزرگ رہنماؤں کی محنت کو یاد کرتے ہوئے کہا کہ انہی کی بدولت آج بی جے پی دنیا کی سب سے بڑی پارٹی بنی ہے، ساتھ ہی انہوں نے تمام عہدیداروں اور کارکنوں کے تعاون کو بھی سراہا۔ اس موقع پر وہ جذباتی بھی نظر آئے اور انہوں نے بی جے پی کی تعریف کرتے ہوئے کہا کہ اس پارٹی کے لیے کارکن ہی سب سے بڑا سرمایہ ہیں اور پارٹی نے انہیں وہ سب کچھ دیا ہے جس کا انہوں نے کبھی تصور بھی نہیں کیا تھا، کیونکہ انہوں نے زندگی بھر محض ایک کارکن کے طور پر پارٹی کی خدمت کی ہے۔