National

انڈین ریلویز کی بڑی پیش قدمی، جنرل کوچ میں سفر کرنے والوں کو 20 روپے میں ملے گا کھانا

123views

انڈین ریلویز نے جنرل کوچ کے مسافروں کا خیال رکھتے ہوئے ایک بڑی پیش قدمی کی ہے۔ جنرل کوچ کے ریل مسافروں کو پلیٹ فارم پر کفایتی شرح پر کھانا دستیاب کرانے کی تیاری ہو چکی ہے جس کے تحت 20 روپے میں پوڑی اور سبزی دی جائے گی۔ اس کے علاوہ 50 روپے میں کھانے کا ایک پیکٹ بھی ہوگا جس میں چپاتی اور سبزی وغیرہ دی جائے گی۔

دراصل گرمی کی چھٹیوں میں ٹرینیں بھری جاتی ہیں اور اس بھیڑ کی وجہ سے لوگوں کا جنرل کوچ سے باہر نکلنا دشوار ہوتا ہے۔ ٹرین کے دو منٹ ٹھہراؤ کی وجہ سے غریب طبقہ کے مسافروں کو کئی بار بھوکے رہنا پڑتا ہے۔ یہی وجہ ہے کہ ریلوے نے کفایتی شرح پر کھانا دستیاب کرانے کی تیاری کر لی ہے۔ ایک ریلوے افسر کے مطابق آئی آر سی ٹی سی کے ساتھ مل کر ریلوے نے مسافروں، خصوصاً غیر ریزرو ڈبوں میں سفر کرنے والوں کی خدمت کے لیے یہ پیش قدمی کی ہے۔ افسر کا کہنا ہے کہ 100 اسٹیشنوں کے تقریباً 150 پلیٹ فارم پر کھانے کے کاؤنٹرس کھولے گئے ہیں اور اس سہولت کی آنے والے دنوں میں مزید توسیع کی جائے گی۔

قابل ذکر ہے کہ ریلوے نے جنرل کوچ کے مسافروں کو پینے کا پانی مہیا کرانے کا انتظام پہلے ہی کر دیا ہے، اور اب کھانے کا انتظام بھی ہو گیا ہے۔ ریلوے افسر کا کہنا ہے کہ اس بار ریکارڈ تعداد میں مسافر ٹرینوں میں سفر کر رہے ہیں۔ جنرل کوچ میں بھی مسافروں کی تعداد بڑھی ہے۔ ٹرین رکنے کے بعد جنرل کوچ کے مسافر ڈبے سے باہر نہیں نکل پاتے، اسی لیے ریلوے نے یہ خاص انتظام کیا ہے۔ انھوں نے بتایا کہ گزشتہ سال تقریباً 51 اسٹیشنوں پر اس سروس کا کامیاب تجربہ کیا گیا تھا۔

Follow us on Google News
Jadeed Bharat
www.jadeedbharat.com – The site publishes reliable news from around the world to the public, the website presents timely news on politics, views, commentary, campus, business, sports, entertainment, technology and world news.