ایندھن کی قیمتوں میں اضافے پر پرمود تیواری کا مودی حکومت پر حملہ، کہا- ’’عام آدمی کی جیب پر ڈاکہ‘‘

نئی دہلی، 15 مئی (یو این آئی) کانگریس کے راجیہ سبھا ایم پی اور نائب اپوزیشن لیڈر پرمود تیواری نے پیٹرول اور ڈیزل کی بڑھتی ہوئی قیمتوں کے حوالے سے مرکز کی بھارتیہ جنتا پارٹی (بی جے پی) حکومت پر حملہ بولا ہے۔مسٹر تیواری نے الزام لگایا کہ پانچ ریاستوں کے انتخابات ختم ہوتے ہی مرکزی حکومت نے ایندھن کے دام بڑھا کر عام جنتا پر اقتصادی بوجھ ڈال دیا ہے۔ انہوں نے کہا کہ “مودی حکومت ہمیشہ انتخابات ختم ہونے اور وزیر اعظم کے غیر ملکی دورے کے دوران عوام پر مہنگائی کا بوجھ ڈالنے کا کام کرتی ہے۔ یہی ان کا فارمولا بن گیا ہے۔” انہوں نے الزام لگایا کہ جب بین الاقوامی مارکیٹ میں خام تیل کی قیمتیں کم ہوتی ہیں، تب حکومت پیٹرول اور ڈیزل کے دام کم نہیں کرتی لیکن جیسے ہی قیمتوں میں اضافہ ہوتا ہے، اس کا براہِ راست بوجھ عام آدمی پر ڈال دیا جاتا ہے۔ کانگریس ایم پی نے سابق وزیر اعظم منموہن سنگھ کے دور کا ذکر کرتے ہوئے کہا، “سب سے مہنگے دور میں بھی پیٹرول کی قیمت 70 روپے فی لیٹر سے اوپر نہیں جانے دی گئی، جبکہ موجودہ حکومت میں قیمتیں 100 روپے کے قریب پہنچ گئیں۔”راجیہ سبھا ایم پی نے مرکزی حکومت پر سرمایہ داروں کو فائدہ پہنچانے کا الزام لگاتے ہوئے کہا، “جب دام کم ہوئے تھے، تب عوام کو راحت کیوں نہیں دی گئی؟ حکومت صرف اپنے سرمایہ دار دوستوں کو منافع پہنچانے میں لگی ہوئی ہے۔” مسٹر تیواری نے وزیر اعظم نریندر مودی کے غیر ملکی دورے اور ان کے طیارے کے بارے میں بھی طنز کرتے ہوئے کہا کہ “دو گاڑیوں والی فوٹو ریل تو بن گئی، اب اسی لگژری طیارے سے غیر ملکی دورہ کیا جا رہا ہے، جیسا طیارہ امریکی صدر استعمال کرتے ہیں۔” انہوں نے کہا کہ ایندھن کی قیمتوں میں اضافے سے ہندوستان کے عام آدمی کی جیب پر ڈاکہ ڈالا گیا ہے اور وہ اس کی سخت الفاظ میں مذمت کرتے ہیں۔